Nag-'Rambo' nga mga sikyu gikasuhan

Gipasakaan na og kasong multiple frustrated murder ug direct assault to person of authority sa kapolisan ang 39 ka mga suspetsadong responsiable sa gubat sa barangay Saavedra lungsod sa Moalboal niadtong milabay'ng adlaw nga miangol og upat ka tawo.

Si Chief Inspector Juanito Enguera ang hepe sa Provincial Investigation and Intelligence Branch mitug-an sa Banat News nga ilang gipasakaan og kaso ang 29 ka gwardiya sa Tri-Island Holdings Corporation nga sakop sa Grandeur Security Agency uban sa unom ka sibilyan workers niini.

Matud pa ang Tri-Island miangkon sa gibana-banang 70 porsiyento sa mga luna sa Sitio Bas barangay Saavedra nga mao karoy hinungdan sa kagubot tali sa mga molupyo ug mga residenteng nanag-iya og mga luna sa maong lugar.

Samtang sa mga gipasakaan og kaso gilangkuban kini sa duha ka mga retiradong koronel, usa ka abogado ug usa ka caretaker sa Tri-Island base usab sa giluwatang mga affidavit sa mga testigo.

Ang mga retiradong opisyal mao ang nailhan lang sa ngan nga Col. Pilar nga kanhi sakop sa Criminal Investigation and Detection Group sa Abra ug lain pang retiradong opisyal nga si Col. Rodito Carlopa sa Philippine Marines, Luisito Tabores ang manager sa Prospect General Services diin ang ilang mga kawani nagserbisyo usab sa Tri-Island ug ang caretaker nga si Claudio Temblor.

Matud pa ni Enguera ang duha ka mga koronel maoy mipatigum sa mga residente sa Saavedra niadtong Sabado ug giingong mi-haras kanila sa pag-ingon nga kinahanglang mamiya na sila sa ilang mga luna aron walay dautang mahitabo.

Mipasalig ang mga polis nga luwas ang mga gwardiyang gipanakop sa mga polis human mabalaka ang ilang mga kabanay sa seguridad gumikan sa posibleng panimalos nga himuon sa mga residente, dugang mga polis gikan sa Regional Mobile Group ug Special Reaction Unit sa Provincial Police ang gipadala sa maong dapit.

Samtang girelibuhan usab ang hepe nga si Chief Inspector Virgilio Apurado ug gihulipan kini ni Sr.Inspector Jason Mangaron gumikan sa insidente.