Barangay disaster Action Team ilunsad

Ipa-ubos sa training seminar ang tanang mga opisyal ug mulopyo sa 20 ka mga barangay dinhi sa dakbayan sa Sugbo nga gihulagway nga mga lugar nga peligro sa katalagman sama sa lunop ug landslide.

Pagpangandam kini sa gi-planong tukoron sa siyudad nga Barangay Disaster Response Action Team nga motudlo'g medical, non-medical emergency procedures.

Si konsehal Gerry Carillo action officer sa Cebu City Disaster Coordinating Council kon CCDCC ingon man ang executive director nga si Rolando Ardosa maoy mopasiugda sa himoong training seminar.

Ang barangay Suba, Pasil ug Sawang Calero maoy gitakdang ipa-ubos sa unang tulo ka adlaw nga seminar nga himuon sugod karung adlawa hangtud sa petsa 30.

Ang mga barangay nga mosunod mao ang San Roque, Ermita, Duljo Fatima, Mambaling, Basak San Nicolas, Cogon Pardo, Inayawan, T. Padilla, Day-as, Zapatera, Luz, Carreta, Tejero, Calamba, Sambag-II, Sambag-I ug Pahina Central.

Si mayor Tomas Osmeña migahin og P2.2 milyones ka alang ning maong katuyo-an.