Tulak arestado sa Antique

MANILA, Philippines - Timbog ang hinihinalang tulak ng droga sa probinsya ng Antique sa ginawang buy-bust operation, ayon sa Philippine Drug Enforcement Agency (PDEA) ngayong Martes.

Nakorner ng pinagsamang puwersa ng PDEA at Philippine National Police si Romeo Otillano, 40, ng Rodriguez Subdivision, Baranggay 8, San Jose, Antique noong Huwebes ng nakaraang linggo.

Sinabi ni PDEA chief Arturo Cacdac Jr. na numero uno sa target list ng mga drug personality sa probinsya ng Antique si Otillano.

Inaresto si Otillano matapos magbenta ng P1,000 halaga ng shabu sa isang ahente ng PDEA sa Barangay Poblacion sa bayan ng Patnongon bandang 7 ng gabi noong Pebrero 21.

Nakuha kay Otillano ang dalawa pang pakete ng shabu, pera at ang P200 marked money na ginamit sa transaksyon.