P.5M shabu nasakmit

CEBU, Philippines – Molapas sa tunga sa milyon ka pesos nga kantidad sa gituohang shabu ang nasakmit sa kapolisan sa managlahing mga operasyon.

Ang mga sakop sa City Intelligence Branch sa Cebu City Police Office milusad og operasyon diha sa Sitio Mahayahay, Barangay Calamba  batok ni Charlie Silvano, 19, giingong usa ka level 2 drug pusher ug nagpuyo sa maong lugar.

Matud pa ni Inspector Gomersendo Mandawe ang deputy chief sa CIB nga nahinabi sa Banat News, kanhi operator sa usa ka printing press si Silvano ug kini misulod sa maong ilegal nga negosyo sa dihang nawad-an kini og trabaho.

Nakuha sa sulod sa balay ni Silvano ang pito ka dagko nga putos, duha ka medium ug duha ka gagmay nga pakete nga pulos dunay sud nga gituohang shabu nga dul-an tunga sa milyon ka pesos ang kantidad.

Sa pakighinabi sa Banat News sa suspetsado miangkon kini nga namaligya siya og shabu apan bag-o pa siya nagsugod niini.

Samtang sa lungsod sa Dalaguete, nasikop usab ang magtiayong sila si Joseph, 52 ug Sheila Nicor, 41 sa Sitio Panokdokan, Barangay Cawayan pinasikad sa search warrant nga gi-isyu ni RTC Judge Maximo Perez sa Branch 26 sa lungsod sa Argao. Nakuhaan sila og 59 ka gagmay nga pakete.

Samtang nadakpan sa Sitio Basak Iba, Barangay Basak, Dakbayan sa Lapu-Lapu  sila si Alexander Asis Soliano, 50 anyos, taga Sitio Buyong, Barangay Maribago,  Germie Amodia Pangatungan,  28, ug Francis Ybañez Cabardo, 26, samtang nakaeskapo si Agustin Agbay Jr. dala ang P200 nga buy-bust money. Dise-sayes pakete, duha ka medium size nga paketeng shabu, P600 nga kwarta ug mga drug paraphernalia ang nakuha kanila. BANAT NEWS