Ginebra giusban, Star 2-0 na sa series

CEBU, Philippines - Giusban og pilde sa Star Hotshots ang Barangay Ginebra San Miguel, 91-89 aron molansang og 2-0 nga bentaha sa “best-of-seven” semifinals series sa PBA Philippine Cup kagabii     didto sa Mall of Asia Arena.

Nakita gyud ang dakung epekto sa depensa sa Ginebra sa pagkawala nila ni Greg Slaughter ug Joe Devance ug sama  sa   Game-1  nakabuwelo na  usab  og  iskor   ang Hotshots.

Misalida sila si Paul Lee ug Alain Maliksi sa first half  aron moposte  og singko puntos nga labaw sa iskor nga 50-45 pabor sa Hotshots.

Sikit ang duwa sa third period, apan pag-abot sa katapusang kuwarter  nakapabor sa binayloay og puntos ang Star, samtang nagkagidlay ang Ginebra nga nakahimo og daghang turnovers.

Ang duha ka free-throw ni Raffi Reaves sa katapusang siyete segundos maoy miselyado sa daog sa Star, 91-87.

Si Lee adunay 17 puntos, samtang si Maliksi mirehistro og 14 puntos alang sa Star nga mosuway pagduol sa finals pinaagi sa pagdaog sa Game-3 unya sa Lunes.

Nausik ang career-high 25 puntos sa rookie nga si Kevin Ferrer tungod  kay napilde man ang  Ginebra. (BANAT NEWS)