Mga kawani sa CPDRC nakatubag na sa reklamo

CEBU, Philippines - Sutaon sa Committee on Discipline and Investigation (CODI) sa Kapitolyo kung mapasakaan ba og pormal nga kaso ang kawani ug kanhi officer-in-charge sa Cebu Provincial Detention and Rehabilitation Center (CPDRC) labot sa mga ilegal nga nahitabo sa prisohan.

Si Provincial Legal Officer, Atty. Orvi Ortega, chairman sa CODI, nibutyag nga ang 11 ka kawani nga gipaubos sa imbestigasyon lakip na niini ang kanhi OIC warden nga si Dr. Gil Macato niduso na sa ilang tubag sa reklamo.

Gibutyag ni Ortega nga ang CODI gikatakdang mag-deliberate sa mga nahipos nilang impormasyon gikan sa tubag sa mga hingtungdan kung satisfactory ba ug dili na lang sila pasakaan og pormal nga reklamo.

Ang kasamtangang OIC sa CPDRC nga si Bobby Legaspi niduso kini og pormal nga reklamo batok sa 11 ka kawani.

Sa 11, lima ang gireklamo nga wala motuman sa direktiba ni Gobernador Hilario Davide III nga ibalhin niadtong Enero ngadto sa New Bilibid Prison ang 17 ka piniriso.

Si Macato, usa ka babayeng empleyado ug tulo ka prison guards ang gipasakaan usab og reklamo ni Legaspi kabahin sa gihimong kubol sa infirmary sa CPDRC nga giingong alang sa usa ka piniriso kinsa igsuon sa nurse nga nadestino sa maong prisohan.

Ang ikatulo nga kaso nga gipasaka ni Legaspi may kalabutan sa usa ka kawani sa prisohan kinsa niangkon nga iya ang usa sa tulo ka laptops nga nasakmit gikan sa selda atol sa greyhound operation sa Philippine Drug Enforcement Agency (PDEA). (BANAT NEWS)