Bata gikan sa tunghaan naanod sa baha
CEBU, Philippines — Patay na nga nakaplagan kagahapon sa buntag ang 7-anyos nga babayeng tinun-an sa Grade-1 sa dakbayan sa Danao human kini maanod sa baha didto sa Barangay Sibakan kaniadtong Martes.
Ang biktima nga si Danilyn Matugas giingong mopauli na unta sa ilang panimalay kay half-day ra ang ilang klase sa Langosig Elementary School tungod sa bati nga panahon.
Matud ni Raphael Luche, pangulo sa Emergency Response Management sa Provincial Disaster Risk Reduction Management Office nga ang panimalay sa bata tabukonon pa og sapa gikan sa tunghaan.
Ang ginikanan sa bata mi-report sa mga otoridad kay nahapon na lang ug wala gayud mauli ang ilang anak gikan sa tunghaan.
Wala dayon makahimo og search and rescue operations ang mga otoridad kay taas pa kaayo ang tubig-baha tungod sa nagpadayon nga uwan.
Kagahapon sa buntag na nga nakaplagan ang lawas sa bata nga didto sa gitawag nila’g Sitio Malingin linaw sakop sa Barangay Sibacan, mga duha ka kilometro paubos gikan sa Barangay Langosig.
Ang subsob nga uwan kaniadtong Martes nakamugna og baha nga nakapabanlas og duha ka balay didto sa Minglanilla ug Asturias, apan walay gikatahong namatay. (BANAT NEWS)
- Latest
