P1.6M marijuana gilarot sa balamban
Sumala pa ni SPO3 Jose Ranielito Villarino sa Balamban Police Station nakadawat sila og sumbong gikan sa usa ka concerned citizen nga adunay mga tanom sa marijuana sa maong lugar. Philstar.com/File photo
CEBU, Philippines — Kapin usa ka milyon nga balor sa marijuana ang gipanglarot didto sa usa ka bakanteng yuta sa hilit nga lugar sa barangay Bayong, lungsod sa Balamban kagahapon sa buntag.
Sumala pa ni SPO3 Jose Ranielito Villarino sa Balamban Police Station nakadawat sila og sumbong gikan sa usa ka concerned citizen nga adunay mga tanom sa marijuana sa maong lugar.
Tungod niini ilahang gisusi ang lugar kauban ang mga sakop sa militar nga nadestino sa ilang lungsod. Matud pa nga naabot og 8,341 ka punoang marijuana nga mobalor P1,668,200 ang ilang nadiskubrehan ug dali nilang gipangibot.
Atoa sa bukid nahimutang ang maong barangay ug dili dali nga masigpatan ang gitamnan kay hilit na kaayo ug dili maagian og tawo. Walay nadakpang nananom niini.
Dugang pa niya mga mas tutokan pa nila ang pagbantay sa maong lugar sanglit dili kini ang unang higayon nga naibtan kini og marijuana.
Tungod sa gilay-on sa lugar ug kadaghan sa mga nalarot nga punoan sa marijuana naglisod na sila pagdala niini hinungdan nga gisunog na lang nila kini ug nagdala na lang og pipila ka punoan aron gamitong ebidensya. (BANAT NEWS)
- Latest
