Natakboyan og HIV nagkadaghan gihapon

CEBU, Philippines — Gipahigayon dinhi sa Dakbayan sa Sugbo ang panagtigum sa tanang mga lugar sa Visayas ug Mindanao nga adunay HIV nga gilangkoban sa mga Non-Government Organization ug mga private partner aron tukion kung asa na sila karon ilabi na nga nagkataas gihapon ang ihap sa mga natakboyan sa maong sakit.

Matud pa ni DOH-7 Regional Director Jaime Bernadas ilang tukion ang mga estratehiya ug kon asa sila motutok ug unsa na usab nga mga prevention and control ilang buhaton.

Si Dr. Van Philip Baton, Coordinator sa Re-Emerging Infectious Disease Program sa DOH-7 nitug-an nga nagkataas gihapon ang ihap sa natakboyan sa HIV/AIDS.

Bisan og wala pa silay gihuptan nga bag-ong datos apan sa nilabay nga Hunyo 2017 aduna silay 1,013 reported cases, 944 lalaki ug 69 ang babaye ug 29 niini na ang namatay. Nag-una nga hinungdan mao ang pakighilawas sa parehong lalaki.

Dugangan usab ang mga treatment hubs nga buksan sa sunod tuig ug anha ibutang sa Visayas Community Hospital, Talisay District Hospital, ug Eversley Child Sanitarium sa Dakbayan sa Mandaue.

Dugang kini sa tulo ka mga hubs nga anaa sa Negros Oriental, Bohol ug Vicente Sotto Memorial Medical Center dinhi sa Sugbo. Si Leila Coppens, representante sa World Health Organizations nitug-an nga naalarma sila sa nagkasaka nga ihap sa HIV cases dinhi sa Pilipinas ilabi na sa Sugbo.

Giawhag ni Coppens kadtong mga aktibo sa pakighilawas nga magpatan-aw ug dili angay mahadlok kun nagduda silang natakboyan na niini.

Iyang giklaro nga dili kataposan dinhi sa kalibutan kung masayran nila nga aduna silay HIV tungod kay mas madali hinoon sila mahatagan og tambal aron makontrol ang pagkuyanap niini diha sa ilang lawas ug mabuhi silang normal. (BANAT NEWS)