Oarfish nadagsa sa Toledo
CEBU, Philippines — Gikagubtan sa mga residente ang usa ka patay nga mola-mola (Oarfish) nga nadagsa sa baybayon sa barangay Daanlungsod sa dakbayan sa Toledo kagahapon sa buntag.
Ang mga kawani sa Atlas Fertilizer Corporation ang nakakita sa patay na nga isda ug nakig-alayon ngadto sa mga otoridad sa siyudad sa Toledo.
Samtang gipahibalo usab si Lutherian Hernando, supervisor sa Department of Environment and Natural Resources DENR-Toledo kalabot sa maong hitabo.
Matud pa nga 10 ka tiil ang gitas-on niini ug gibana-bana nga moabot sa 15 ngadto sa 20 kilos ang maong patay nga mola-mola. Matod ni Hernando nga adunay gamay nga samad sa ulo nga bahin ang nahisgutan nga isda apan wala hibaw-i kun mao kini nakaingon sa pagkamatay niini.
Gipahibalo usab ni Hernando ang Bureau of Fisheries and Aquatic Resources o BFAR-7 kalabot niini. Ang BFAR mimando nga ipalubong dayon ang maong isda.
Gituohang tungod sa kusog nga hangin ug dagkong balod sa Tañon Strait maong gidagsa kini sa baybayon. (BANAT NEWS)
- Latest