Kalag ni Lola Emak MIAPAS

CEBU, Philippines - Usa sa mga tigbasa sa Banat News ang mipaambit sa iyang makapanimbawot nga kasinatian usa ka higayon sa kalag-kalag kaniadto.

Si Carlos Lastimoso, 44, lumad nga taga Santa Felomina sa Alegria apan kasamtangang nagpuyo sa Tugbongan, Consolacion mibutyag nga nahitabo kini niadtong dekada setenta dihang nagtrabaho pa siya sa usa ka rattan factory nga gitrabahoan sa iyang mga uyoan.

Niadtong panahona wala pa mauso ang cellphone ug dili pa usab kaayo daghan ang nagbaton og telepono sa kalungsoran.

Kadaghanan kanilang manag-agaw gipatrabaho sa ilang mga uyoan sa nagkalainlaing pabrika sa dakbayan sa Mandaue.

Matud pa ni Caloy nga usa ka higayon niana nga naghurot gayod og pamauli ang iyang mga uyoan apan wala siya makakuyog kay adunay dinaliang order nga iyang tiwason.

Apan samtang siya nagtrabaho gitawag siya sa ilang gwardiya kay dunay nangita niyang babaye sa gate. Sa pag-adto niya sa gawas wa diha ang maong babaye nga gihulagway sa gwardiya nga tiguwang na. Sa pag-uli niya sa gipuy-an, gisugat siya sa iyang amigo nga giila niyang si Anton ug mipahibalo nga miabot ang iyang apohan nga si Lola Emak kay nangita niya.

“Bay Caloy, dinhi ganiha si Lola ug nanugon nga papaulion  ka karon dayon sa inyo. Gipalingkod ko man gani ‘to ug giingnan nga huwaton ka lang kay mogawas man ka og paniudto pero milakaw man kay nagdali kuno siya,”asoy pa ni Anton.

Wa siya motuo ani tungod kay luya na man iyang apohan ug wala usab kini makatultol sa iyang giabangan. Dali siyang miuli sa ilaha ug nahibulong siya nga daghang tawo sa ilang balay.

Diha niya nasayran nga gihaya na diay iyang apohan. Iyang nasayran nga tulo na ka adlaw nga patay ang iyang lola.Nagtuo si Caloy nga buot g’yud siyang papaulion sa apohan aron bisan sa kataposang higayon makita niya kini. (Romeo T. Limpangog/EIM)(BANAT NEWS)