Mananagat sa Carmen missing

CEBU, Philippines – Moabot na sa upat ka adlaw nga gipangita ang usa ka mananagat sa lungsod sa Carmen kinsa gikataho nga missing sukad pa niadtong Biyernes.

Ang gikataho nga missing giila nga si Esteban Luna Jabilles, 44, ulitawo, nga taga barangay Luyang sa maong lungsod.

Si SPO2 Simplicio Gibo sa Carmen Police Station miingon nga ang silingan sa pamilya’ng Jabilles nga usa ka barangay tanod ang mitaho sa kapolisan sa pagka-missing ni Jabilles.

Sa gihimo nga pasiunang imbestigasyon sa kapolisan nasayran nga katapusang nakit-an si Jabilles sa iyang nga kauban sa kadagatan sa Carmen nga nangisda apan wala na makauli.

Duda ang kapolisan nga gumikan sa dautang panahon nga miigo sa nanglabay nga adlaw, posibleng gi-anod sa layo’ng dapit si Jabilles apan wala usab gipadaplin sa kapolisan ang posibilidad nga naunlod ang gisakyan niini nga pumpboat.

“Basin pag-gikan nila kaya pa ang dagat, wala ta kabalo sa nahitabo pag-abot na sa dagat,” matud ni Gibo.

Nanghinaut ang kapolisan nga unta napadpad lang sa silingan nga mga lugar ang maong mananagat diin ila na usab gipahibawo ang kapolisan sa mga silingan nga lungsod.  -/GMR) (BANAT NEWS)