Dioscora (138)
PINAG-IISIPANG mabuti ni JC ang mga sinabi ng manager ukol sa may-ari ng kompanya. Matulungin umano ang may-ari at may pinaaaral na mahihirap na estudyante na masisipag mag-aral. At halos lahat ng mga scholars ay nagtatrabaho sa kompanya. Nagkaroon nang magandang buhay dahil sa magandang ipinagkaloob ng may-ari.
At ideya pala ng may-ari na kunin ang lahat nang nanguna sa board exams ng mechanical engineering. Kaya ang lahat ng mga matataas na opisyal ng kompanya ay pawang topnotchers.
At ang isa sa nakagulat kay JC, nabasa na raw ng may-ari ang story niya sa broadsheet at maski raw ito ay hanga sa kanya. Totoo kaya ‘yun? Sabagay, bakit naman magsisinungaling ang manager sa kanya? At sa tingin ni JC, hanga rin talaga sa kanya ang manager. Paulit-ulit ngang tinanong sa kanya kung paano nagawang mag-topnotcher ng isang katulad niyang working student. Kahanga-hanga umano ang ginawa niya.
Sa bahaging iyon, nakadama ng guilt si JC. Hindi kasi nakasaad sa story na isang babae ang nagpaaral sa kanya—walang iba kundi si Mam Dioscora. Ang nasa isipan nang marami, sa pagiging working student niya natupad ang lahat at walang tumulong.
Gayunman, naintindihan niya si Mam Dioscora at susundin niya ang gusto nitong mangyari.
KINABUKASAN, nakaharap ni JC ang mayamang may-ari ng kompanya—ang biyenan ni Mam Dioscora.
Habang kaharap ang may-ari, kinakabahan siya. Parang mahirap paniwalaan na may gagawing masama kay Mam Dioscora ang taong ito.
Itutuloy
- Latest