Dynasty ipinagpatuloy ng Cool Smashers
MANILA, Philippines — Kung may naipakita at napatunayan man ang Creamline sa pagkopo sa korona ng 2024 PVL All-Filipio Conference, ito ay ang pagtitiwala sa isa’t isa anuman ang mangyari.
Ito ang sinabi ni veteran Alyssa Valdez matapos kumpletuhin ng Cool Smashers ang 2-0 sweep sa Choco Mucho Flying Titans sa kanilang best-of-three championship series.
“This win, this conference, just proved that we stick and stay together despite everything,” sabi ng 30-anyos na si Valdez. “It showed our faith and hope, na kakapit kami hanggang dulo.”
Tinalo ng Creamline ang Choco Mucho sa Game One, 24-26, 25-20, 25-21, 25-16, at sa Game Two, 20-25, 25-20, 22-25, 25-22, 15-11, para angkinin ang pang-walong PVL crown.
“One thing na na-prove ng challenges namin this conference is iyong pagtutulungan namin hanggang dulo. Everyone helped. Lahat hindi bumitaw,” wika ng tinaguriang ‘Phenom’.
Kumpara sa 15-0 pagwalis sa nakaraang komperensya ay halos muntik nang masibak ang Cool Smashers sa semifinals.
Tinalo sila ng Flying Titans sa una nilang laro sa single-round semis bago igupo ang Petro Gazz Angels at Chery Tiggo Crossovers para ilista ang 2-1 record.
Winalis ng Choco Mucho sa likod ni Sisi Rondina ang tatlo nilang laro sa semis papasok sa ikalawang PVL finals stint.
“Sobrang hirap talaga kasi minsan gumigising kami sa umaga na ‘aabot ba tayo?’ pero alam lang namin na sa mga susunod pang mga laban namin, sa mga susunod na championship, alam namin na kaya naming lumaban,” ani Jema Galanza na hinirang na Finals MVP.
Sa panalo ng Creamline sa Game One at Two ay humataw si Galanza ng parehong 20 points at nakahugot ng suporta kina Valdez, Tots Carlos, Michele Gumabao, Kyle Negrito, Pangs Panaga at Bernadeth Pons.
Sa susunod na kumperensya ay inaasahang muling makakasama ng Cool Smashers si veteran setter Jia de Guzman na naglaro sa Japanese league.
“Iyong status niya hindi pa namin alam but we will know bago mag-start next conference,” pahayag ni coach Sherwin Meneses kay De Guzman.
- Latest