Dili angay’ng mag-unay

Sa dili ka pa motulisok sa botante nga matental sa vote buying nga bugo, palihug hunahunaa ni: Posibleng dili siya taphaw, mahimong nahibawo siya nga sayop ang pagdawat og kuwarta gikan sa mga politiko, duna gani kahigayonan nga nakatugkad siya nga suburno gikan ra sab sa iyang buhis.

Pero wala siyay kapilian. Kon dili dawaton ang kuwarta mahimong mapasmo ang iyang mga anak. O mamatay nga dili matambalan ang ilang masakiton. O mapahawa sa ilang balay kay pila na ka buwan nga wala makaabang. O maputlan sa kuryente ug tubig.

***

Imbes sawayon ang kinabag-an sa mga botante nga nagawongan sa mga dinastiya, nailad sa fake news ug padayong nagbalaan sa kinawatay sa mga Marcos ug pinatyanay sa mga Duterte, nalingaw sa kanta ug sayaw sa mga artista ug taphaw nga mga politiko, dili ba mas maayo nga ato silang sabton?

Sa dili pa sukmatan ang mayoriya nga imbes mosalikway mahimo hinuon nga mas mopalig-on pa sa mga kawatan ug mga mapahimuslanon sa gahom sa eleksiyon karong Mayo 12, dili kaha mas makiangayon nga atong subayon ang ilang gigikanan?

***

Dako ang tentasyon sa pagtuo nga nahiloan lang ang ilang panghunahuna. Nga makamata ra sila kon mahatagan sa sakto nga kasayuran. Nga kon mahibawo na sa tinuod nga mga panghitabo sa atong nasud, segurong ilang ibasura ang dunot nga pamolitika.

Pero sa dili pa ta mangambisyon sa pagpasabot, nga lisod himuon kon padayong magtuo nga mas kamao ta kay nila, mas maayo tingaling ato una silang paminawon. Tingali ang ilang mga sugilanon makatabang sa pagbugkos nato isip katawhan ug nasud.

***

Labing epektibong paagi pagluwas sa katawhan gikan sa pagpahimulos sa mga politiko mao ang paghaw-as nila gikan sa kalisod. Kay kon makabarug na sa ilang kaugalingong mga tiil dili na kadiktahan sa mga nagtungkawo sa gahom. Pero unsaon paglambo sa kinabag-an nga ang mga politiko nga nagkontrolar sa panudlanan ug mga programa sa gobyerno determinado mang magpabilin silang gutom ug walay edukasyon?

Masidlakan ug masawopan ta sa adlaw nga magpabiling linupigan. Gawas lang kon makaamgo nga, imbes maglalis sa mga butang nga nakapabuak-buak nato, dunay mas dagko, mas importante ug mas dinaliang mga butang nga makahiusa nato.