Pangandam sa umaabot kaguliyang

Wa kinahanglana ang lalis kon mapatuman pa ba ang Bayanihan To Heal As One Act human sa pagsugod sa duha ka buwan nga bakasyon sa mga senador ug mga kongresista sa niaging semana. Kon may klaro pa lang untang direksiyon ang kampanya batok sa COVID-19, wa unta mapasagdi nga mapupos ang balaod.

Ang labing seryusong implikasyon sa pagkapupos sa balaod dungan sa pag-adjourn sa Kongreso mao nga di na magamit ni Presidente Rodrigo Duterte ang emergency powers, apil nang paggasto sa P100 bilyones sa ikaduhang hugna sa Social Amelioration Program (SAP).

* * *

Inay ipasabot nganong wa mapasar ang balaod nga molugway sa emergency powers sa presidente pagbatok sa COVID-19, nagtinulisokay na hinuon ang kadagkoan sa Kongreso ug Malakanyang:

- Ang mga senador ug mga eksperto sa balaod nitumbok sa sugod sa 1987 Constitution nga ang emergency powers sa presidente nga gihatag sa Kongreso mapupos sa pag-adjourn sa Senado ug House of Representatives; apan

- Si presidential spokesman Harry Roque niinsistir nga epektibo pang balaod hangtod sa Hunyo 25 kay tulo ka buwan ang lahutay ini human pirmahi sa presidente niadtong Marso 24.

* * *

Di kapanghunaw ang mga sakop sa Kongreso sa responsibilidad sa bulilyaso. Kay duna silay igong panahon ug gidominahan ang House ug Senado sa mga alyado sa presidente ug busa wa g’yud untay hinungdan nga wa nila mahingpit ang bag-ong balaod.

Sa pikas nga bahin, sad-an sang Malakanyang. Mas paspas untang mapasar ang bag-ong balaod kon gi-certify pa sa presidente nga urgent. Kay mahimo na mang laktawan ang panginahanglan pagpasar ini sa una, ikaduha ug ikatulong pagbasa sa buwag nga mga adlaw.

* * *

Nipasalig hinuon ang Malakanyang nga kon tinuod nga naputol nang emergency powers sa presidente sa niaging semana, mahimong mopatawag ang presidente og special session ug gipaabot nga motambong ang mayoriya sa mga senador ug mga kongresista.

Sa kamahinungdanon ug kadinalian sa kampanya batok sa COVID-19 angay untang likayan kining wa kinahanglana nga komplikasyon. Kon nataligam-an man gani paglugway ang balaod nga maoy tinubdan sa tanang gahom ug kuwarta sa kampanya, di na diay ikahibung nganong nagkayamukat ang hapit tanang aspeto sa kampanya. Hinaot nga makurhian sa di pa mapun-an sa umaabot nga mga kaguliyang.