Dili ba kini panikas?
Awhagon nako ang tagdumala sa usa ka balay-patigayon diha sa Fuente Osmeña nga usbon nila ang dili maayong paagi sa ilang pagpangwarta.
Ang gipasabot nako niini mao ang usa ka coffee shop sa uptown area nga mopabayad og prisyo sa ilang baligya nga subra sa gibutang diha sa ilang price list or menu nga gihatag sa mga kustomer.
Ambot og ako ra ba kaha ang nakabantay niini, o nagpakahilom lang ang uban kay mauwaw nga moreklamo kay basin og ingnon nga wala sila’y kuwarta mao nga mobayad na lang.
Pero wala ko makagusto sa ilang paagi nga mura’g maisip nga pamentaha. Inigsulod nimo, sugaton ka sa waiter ug tunolan ka og menu. Tag P60 ang botelya sa ilang beer.
Duna ko’y bisita ug nakahurot kuno mi og 10 ka botelya. Imbes P600 ang bayranan sa beer, ang ilang ipabayad P715. Dugay na ko nga mag-anhaan sa maong tindahan apan kadto pang Sabado ko nakabantay.
Giingnan ko sa waiter ug sa cashier nga modugang kuno sila og 10 per cent kon magsugod na ang “singing time.” Ngano nga dili man nila sultian ang mga kustomers nga ingon niana ang ilang sistema?
Kon pananglitan ang usa ka tawo may kuwarta ra gyud nga P60 unya paninglan nila og P71.50, dili makabayad ug maulawan lang? Ikaduha, ngano nga P71.50 man nga 10 per cent ra man kaha?
Wala gyud makatubag ang senior waiter sa akong pangutana nganong pabayron man nila ang kustomer og mahal ingon man kon ngano nga dili man nila pahibaw-on sa ilang sistema.
Para nako, ang kustomer andam mobayad bisan pa og mahal basta pahibaw-on lang sa tukma nga prisyo. Nakasulod man gani ko og imnanan diha sa usa ka dakong hotel sa Lahug nga subra pa sa P100 ang prisyo sa beer pilsen, apan walay problema kay nahibawo man ko daan.
Gikuhaan pa ko og contact numbers kay aron manawag kuno ang manager sa tindahan, apan hangtod sa pagsuwat nako niining lindog walay mitawag.
Tambag nako ninyo nga mga tagdumala sa maong coffee shop nga usba ang inyong pamaagi aron dili kamo makabaton og problema ug dili maibanan ang inyong mga kustomer.
* * *
Nakadawat ko og reklamo gikan sa mga tigtumod og isda nga mag-agian diha sa Belgium Street sa Barangay Suba. Mireklamo sila kabahin sa daghang trisikad nga iparada diha daplin sa karsada nga maglisud na hinoon sila sa pag-agi.
Ang mga drayber diay niining maong mga trisikad miparada sa ilang sakyanan samtang nagduwa sila og video karera diha sa maong lugar. Tan-awa, nagmatuod gyud kini sa akong mga report nga wala maundang ang operation sa mga video karera.
Ngano nga wala man kini pangsakmita sa kapolisan nga duol ra man kaayo ang Sawang Calero Police Station sa Belgium Street? Angay’ng manubag niini ang hepe sa maong police station.
Ang report nga miabot nako, nagkanayon nga ang video karera operations nag-operate usab sa ubang mga barangay. Kadtong gusto nga mopahibalo, kontak sa 0943-0766611.
* * *
Nindot ang lakang ni Konsehal Sisinio Andales nga suportahan sa City Council ang balaudnon sa Senado nga kinahanglang hatagan gyud og 14th Month Pay ang mga kawani sa pribadong sektor.
Nindota kon matuman ni no? Sigurado nga mobahakhak gyud ang mga kawani sa pribadong sektor. Ang 14th Month Pay benepisyo kini nga katumbas sa usa ka buwan nga suweldo sa kawani.
Sa ato pa, sa tunga-tunga sa tuig, ang usa ka kawani makadawat na unya og bali’g usa ka buwan nila nga suweldo, ug sa Disyembre lain na usab nga usa ka buwan.
Apan ang resolusyon ni Konsehal Andales nga nag-awhag nga suportahan sa City Council ang balaudnon sa Senado, wala dayon aprobahi sa ubang konsehal.
Gi-refer usa kini sa committee on labor. May pipila kuno ka konsehal nga miingon nga pahimoan pa kini og public hearing. Dili na kinahanglan uy kay dili man kini ordinansa.
- Latest
