Ganahan na moladlad

Dear Tito  Miguel,

Ako diay si  Gelo, taga Barangay Tisa, Cebu City. Usa ko  ka discreet gay. Sa gawas nga panagway ug paglihok,  dili gyud ko mailhan

 Apan sa sulod sa akong kasingkasing, dugay na nakong gidawat ang akong pagkatawo. Ang akong dakong problema karon mao ang pagbutyag niini sa akong mga  higala ug pamilya .

Sa tinuod lang, aduna na koy uyab nga lalaki karon. Malipayon kaayo mi  sa among relasyon ug pwerte niyang buotana. Apan tungod kay gitago pa man nako ang tanan, maglisod mi og suroy o pakig-uban sa gawas tungod sa akong kahadlok nga adunay makakita kanamo.

Murag  malimitahan ang among relasyon kay dili nako siya mapasigarbo sa uban. Gusto na gyud kaayo nako nga mag-out o moangkon sa akong mga higala ug pamilya  aron makagawas na ko sa akong tagoanan ug ma-enjoy usab namo sa akong boyfriend ang among gugma nga walay gitago.  Apan nagduhaduha ug nahadlok ko sa posibleng reaksyon sa mga tawo. Hatagi ko og tips aron duna ko'y kaisog nga moangkon sa akong tinoud nga kolor. - Gelo-

* * *

Gelo,

Paniid unsay ilang tan-aw sa same-sex nga relasyon o dili ba kaha sa LGBTQ+ community mismo. Kun lud-on sila o wala sila’y pakialam basta dili lang kapamilya o higala, hinay hinaya.

Ipaagi’g binuang, ingna nga wa man ka’y nakita’ng babaye nga imong giganahan maski unsa ka guapa, unsa kaha kun lalaki diay imong gusto. Kun dili makadawat, moingon pa gyud nga isalikway ka, pasagdi lang sa. Apan sa sunod balika, ingna seryoso ka sa imong giistorya , nakaamgo ka nga lalaki gyud diay imong gusto. Pero’g mo-ingon kun asa ka malipayon mosuporta sila, wala na ka’y problema.

Kun dili nimo kaya mo-istorya bahin sa imong tinuod nga pagkatawo, ipaagi sa lihok. Ayaw na mo’g tago duha, ipaila-ila siya isip higala. Lakaw ug kuyog mo maski asa. Mapanid-an man gyud nila unsa mo kasuod, duna gyud na’y mangutana unsa man gyud mo, tubaga nga tinuod ilang duda.

Kun unsa man ilang reaksyon, temporaryo ra na. Madawat ra na nila o pasagdan na lang ka. Sa laktod, wala sila’y mahimo. Sakit kun isalikway ka, apan MAs pait kun itago nimo imong tinuod nga pagkatawo. Duna’y mga artista o atleta nga nisugal ug naka-out na, apan wala man mahitabo ilang gikahadlokan nga negatibo nga reaksyon o epekto sa ilang karera. Kun di nimo kaya moangkon sa pulong, ipaagi sa lihok, igo ra ka mokumpirma kun mangutana sila. Basin gani dugay na sila nagduda o nakahibawo, nagpaabot lang nimo. -Tito Miguel-

Magpatambag ka? Ipada kang Tito Miguel: 0991-318-9366