Elijah Alejo mipalag sa bastos nga netizens

CEBU, Philippines — Sa niaging adlaw , nag-post ang Kapuso actress nga si Elijah Alejo sa iyang selfies nga kabahin sa   behind-the-scenes  sa iyang upcoming movie nga She Who Must Not Be Named.

Nakugang ang aktres human siya nakadawat  og malaw-ay nga komento gikan sa pipila ka netizens nga tataw nga nagbinastos kaniya .

“Women are not toys. Hindi kami laruan na pwede niyong pagtripan kung kailan niyo gusto. Hindi kami objects na pwedeng bastusin at tawagin pang ‘compliment,’” suma pa sa aktres.

Matud pa niya nga subo  palandungon nga dunay mga nasaag nga utok o bastos nga mga tawo .

Gihangyo niya ang ubang netizens nga kinahanglan nga matinahuron, ug mas maayo pa nga maghilom na lang kung walay ikahatag nga respeto sa uban.

Jerry Yan, Vaness Wu ug Vic Chou motikang sa Pilipinas

Motikang  sa Manila ang miyembro sa F4 nga sila Jerry Yan, Vanness Wu, ug Vic Chou uban sa miyembro sa Mayday nga si  Ashin alang sa  “F   FOREVER 1st World Tour.”

Gipahibalo kini sa B’in Music pinaagi sa usa ka Instagram reel sa niaging adlaw nga nakapukaw og kalipay ug excitement sa ilang fans. Sa pagsulat niining balitaa, wala  pa gibutyag ang partikular nga  petsa ug venue sa ilang show sa Manila.

Gawas sa Manila, motikang  usab ang maong grupo  sa Chongqing , China (Abril 10 - 12) ug Jakarta , Indonesia (Mayo 29 - 30). Giplanohan usab ang dugang shows sa Bangkok, Singapore, ug Kuala Lumpur, apan wala pa gibutyag ang detalye.

Ang F4 natukod niadtong 2001  ug nailhan sila og maayo  sa serve nga  Meteor Garden uban ang nitaliwan na nga aktres nga si Barbie Hsu.

Nakapagawas na usab sila og mga album nga sama sa “Meteor Rain,” “Fantasy 4ever,” ug “Waiting for You.”

BINI docuseries ipasalida sa Netflix

Makita na sa  streaming platform nga Netflix ang docuseries sa BINI sugod karong  Biyernes, Abril 10.

Gipaluyohan kini  sa iWant Originals ug ABS-CBN News Documentaries, ug gilangkoban og tulo ka bahin nga docuseries nga maglatid sa mga kaagi  sa walo ka miyembro sa grupo , gikan sa ilang auditions, mga hagit sa pandemya, mental health ug personal nga pakigbisog, hangtod sa ilang dako  nga kalampusan. Ang maong proyekto kay ubos sa direksyon ni Jet Leyco, gisulat sa journalist nga Jeff Canoy, gi-edit ni Brian Gonzales, ug giprodyus nila Karen Namora, Hera Sanchez, ug Tanya Jamon-Navarro.

Kahinumdoman nga ang  unang episode nga “Chapter One: Born to Win” napili isip finalist sa 2025 New York Festivals TV & Film Awards alang sa Best Documentary sa Biography and Profiles category.