Knowledge Channel, wagi sa AACA 2025

Wagi ang educational TV series ng Knowledge Channel Foundation Inc. (KCFI) na Ready, Set, Read! sa kategoryang Best Children’s Program ng Asian Academy Creative Awards (AACA) 2025.

Ibabandera ng Ready, Set, Read! ang husay ng mga Pilipino sa paggawa ng educational shows sa Grand Awards sa Singapore sa darating na Dec. 4, tampok ang layunin nitong turuan ang mga bata na makapagbasa at mas maunawaan ang wikang Ingles.

Bida sa serye ang kwento ng batang karakter na si Joji, at ang kanyang mga kaibigang hayop na sina Cathy, Ogot, Marj, at Nene, sa kanilang masayang paglalakbay para makapagbasa sa pamamagitan ng nakaaaliw na mga kanta, sayaw, at tula.

Nakamit na rin ng programa sa mga nakaraang taon ang iba’t ibang parangal tulad ng Anak TV Seal (2023), Special Citation for Best Children and Youth Program sa 44th Catholic Mass Media Awards, KBP Golden Dove finalist citation, at Outstanding CSR Project award mula sa League of Corporate Foundations (2022).