"Maintenance" ni Elisse

CEBU, Philippines — Walay direkta nga tubag si Elisse Joson sa pangutana ni Ogie Diaz kun aduna bay nagparetoke nilang upat ka mga bida sa bag-ong ABS-CBN ug TV5 series nga PiraPirasong Pangarap.

Kauban ni Elisse dinhi isip bida sila si Alexa Ilacad, Eloisa Andalio ug Charlie Dizon.

Sa grand mediacon nga gipahigayon kagahapon, nangutana si Ogie kun aduna ba nilang upat ang nagparetoke kay labihan matud pa nila ka mga gwapa.

Unang nitubag si Elisse diin gituki niya ang mahitungod sa "maintenance" sa mga artista aron matud pa nindot tan-awon.

Dili na matud pa niya tagsa-tagsaon pero aduna siyay maintenance alang sa iyang kaugalingon.

"I have maintenance for myself, na ginagawa ko for myself, " niya pa.

Si Alexa maoy sunod nga nitubag pinaagi sa pag-ingon nga wala siyay giparetoke.

Naningkamot gyud matud pa siya og workout aron nindot siya tan-awon niining maong teleserye.

Si Eloisa sa iyang bahin niingon nga wala siyay giparetoke.

Naningkamot matud pa siya og workout kay sa unang adlaw nila sa taping, dako matud pa siya tan-awon sa screen.

Si Charlie sab niingon nga walay retoke pero aduna siyay mga lakang nga gihimo aron maanindot siyang tan-awon isip artista.

Ang PiraPirasong Pangarap mulugwa na sa ABS-CBN ug TV5 sa July 25, sa hapon.

 Sugilanon kini sa upat ka mga magsuon nga nagkabuwag ug manimpad sa kinabuhi.Rayna sa TikTok

Sulod sa tulo ka tuig, nagpabilin gihapon nga gihuptan ni Andrea Brillantes ang titulo nga most followed Philippine celebrity sa Tiktok. Si Andrea adunay 19.1 million followers sa Tiktok .Nagsunod kaniya sila si Sanya Lopez ( 14.5 million followers), Dasuri Choi ( 14.1 million followers), ug Mona Alawi ( 13.7 million followers).

Busy sa shooting

Gibutyag ni Marian Rivera nga ilaha na nga gikondisyon ang anak nila ni Dingdong Dantes nga sila si Sixto ug Zia nga mawala sila sa mga kiliran niini sulod sa taas nga panahon tungod sa ilang ka-busy. Busy ang magtiayon sa upcoming movie nga Rewind nga ubos sa  ABS-CBN Film Productions Inc.,  APT Entertainment, ug Agosto Dos Media .

Elisse mabdos?

Miulbo ang hungihong nga matud pa mabdos ang aktres nga si  Elisse Joson. Wala pa mohatag og komento ang kampo ni Elisse kalabot sa maong taho. Dili na kaayo mohatag og update si Elisse sa kasikas sa iyang kinabuhi sukad sila nagbalik ni McCoy De Leon.

Natagak sa bike

Nakabaton og pangos sa pipila ka bahin sa iyang lawas ang TV host nga si Gretchen Ho human kini nadisgrasya samtang nag-bike didto sa  Switzerland. Gitataw hinuon niya nga okay na ang iyang kahimtang karon.

Naka-gradwar na gyud

Mapasigarbohong gibutyag  sa teen star nga si Kaori Oinuma nga naka-gradwar na gyud siya sa high school. Niabot og 10 ka tuig ang pagtungha niya sa high school gumikan sa pagsige og undang. Nipaso siya sa  Bartolome Sangalang National High School (BSNHS) sa Nueva Ecija.