Doktoron ang bag-ong Rayna!
CEBU, Philippines — Ang medical student nga si Gabriella Mai Carballo, maoy gikonahan isip Miss Cebu didto sa Plaza Independencia atol sa pageant nga nagpasigarbo sa katahom sa dakbayan niadtong Miyerkoles sa gabii.
Ang "environmental sustainability" maoy adbokasiya sa 23-anyos nga si Gabriella. Suma pa niya nga nagbunga ang iyang pagpaningkamot ilabi na nga todo balanse usab siya sa iyang oras tali sa iyang pagtuon aron mamahimong doctor ug pagpangandam sab alang niining maong pageant nga unang gitakda niadtong January 12, apan nasibog gumikan usab sa hulga sa Covid.
Sa iyang profile , usa sa mga target ni Gabriella mao ang pag-umol og programa sama sa tree-planting activities isip pagkombati sa polusyon.
Si Carballo kinsa gitawag na nga Quincentennial Queen, gumikan kay natunong ang iyang kadaugan sa kasaulogan sa 500 Years of Christianity diin dakong tipik ang Sugbo, namahayag atol sa interview nga nga swerte kaayo siya nga nalakip siya niining maong indigay sa kaanyag.
“I'm so lucky nga nakasulod ko sa Miss Cebu. Thankful kaayo ko sa tanang ni-support nako.Nag-pray ra gyud ko permi. Plan nako karon mao ang mga post- Odette (bagyo)programs, makig-coordinate ta sa Department of Agriculture," matud pa ni Gabriella.
Samtang ang ubang mga mananaog mao sila si Dannika Ocampo (first runner-up), Ciairha Monsanto (second runner-up), Christine Aberion (third runner-up) ug Karla Marie Frances Niere (fourth runner-up).
Sa gipagawas nga audio visual presentations, gipakita sa mga kandidata ang mga lugar ug produkto sa Siyudad sa Sugbo nga mapasigarbo gyud sa tibuok kalibutan.
Gi-highlight usab niadtong gabhiona, ang mga positibong kalidad sa nga Sugbuanon kun diin nakabangon gihapon kini sa mga pagsulay nga gisagobang niini sama sa pandemya ug bagyo.
Tipik sa programa mao ang paghatag og tribute sa giila nga beauty-queen maker sa Sugbo nga si Jonas Borces kinsa nipanaw atol sa pandemya.
Nihatag usab sa hugyaw nila nga performance mao ang Maka Girls nga gilangkoban nila ni Gen Flores, Angel Maranan, ug KC Dilao-Mabano nga puros produkto sa Sinulog Idol.
Nilugwa usab sa maong indigay ang Cebuana singer nga si Maybelle Padillo kinsa nidalit sa iyang latest single nga "Good Vibes".
Si Miss Earth 2008 ug kasamtangang tigpamaba ni Mayor Michael Rama nga si Karla Henry maoy host sa indigay kauban ang aktor nga si Tony Labrusca kinsa nidalit usab og song number niadtong gabhiona.
Samtang si Konsehal Jocelyn Pesquera kinsa pangulo sa Cebu City Tourism Commission, mapasalamaton sa tanang nakatampo sa kalamposan sa maong indigay. Matud pa niya nga daghan gyud ang naghinam-hinam sa maong kalihokan gumikan kay taod-taod gyud kini nga nahunong.
Gudang pa niya, usa sa tumong sa Miss Cebu mao ang pag-promote sa mga hiyas sa Siyudad sa Sugbo.
Unom ka tuig nga walay Miss Cebu. Si Gabriele Raine Baljak ang katapusang Miss Cebu sa wala pa kini ibalik karong tuiga, kinsa nakoronahan niadtong 2016.
MINOR AWARDS
Miss Friendship: Bianca Wilhemina Willemsen
Miss Photogenic: Bianca Wilhemina Willemsen
Most Confident by Dr. Wong's Lightening System:
Christine Marie Aberion
Miss Koomi: Lorraine Hann
Miss Peakway: Lorraine Hann
Miss Fili: Christine Marie Aberion
Miss PAGCOR Charity: Dannika Anne Ocampo
Miss Oro Galleria: Gabriella Carballo
Best Tourism Video: Karla Marie Frances Niere
Best in Modern Kimona: Lorraine Hann
Best in Evening Gown: Rhean Emmanuelle Caruana
- Latest
