Angelito Alia, labing una nga Star of The Night

CEBU, Philippines — Naglibog sa buot bation ang 22-anyos nga si Angelito “Tolits” Alia sa dihang siya ang giproklama nga labing una nga Star of The Night sa unang gabii sa Sinulog Idol Season 11.

Napahigayon ang maong gikahinaman nga sangka sa mga tingog didto sa Fuente Osmeña kun diin nabalik na kini sa maingon nga orihinal nga pwesto human sa duha ka tuig  Ang Season 9  ug Season 10 didto kini napahigayon sa Plaza Independencia.

Sa maong pagbalik, mas gihangop pa kini sa mga tawo kun diin nagpanon gyud kini nga misaksi sa maong kalihukan. Bisan pa man sa daghang kalihukan sa Dakbayan sa Sugbo, wala gyud mosipyat ang mga tawo sa pagtan-aw sa kompetisyon.

Sa matag higayon nga adunay finalist nga motungtong sa entablado, mabuhi gyud ang Fuente Osmeña tungod kay ang 12 ka finalist, nagbitbit gyud sa ilang mga tigsuporta.

Ang 12 ka finalist mipakita sab sa ilang maayo nga timbre sa tingog kun diin mibilib ang mga nanan-aw nga lig-on ang kompetisyon karong tuiga.

Daghan ang nahugyaw sa dihang migawas sa entablado ang 17- anyos nga si Thea Monterde sa dihang giawit niya ang “Royals” nga orihinal nga giawit sa internasyonal nga singer nga si Lorde.

Si Thea nahimong kabahin sa Top 3 sa maong gabii inubanan sa 25- anyos nga si Chreystle Gealogo kinsa malumo nga gikanta ang “Hanggang Ngayon” nga giawit sa Pinoy RnB singer nga si Kyla.

Apan sa maong gabii mipatigbabaw gyud ang pag-awit ni Tolits sa awit nga “Kailangan Kita”.

Sa pagpakighinabi sa Banat News kang Tolits, matud pa niya nga gipili niya ang maong kanta gumikan kay ipahinungod kini sa iyang ginikanan.

“Kay bisag separated na ang akong parents, akong ipafeel sa ilaha nga nagkinahanglan ko nila isip akong ginikanan ug bisan paman sa ilang sitwasyon karun, dili gyapon ko muhunong sa pag-ampo nga unta ma okay na sila puhon”, si Tolits mipadayag.

Dili gyud ikalimod nga wala gyud siya magdahom nga siya ang makaangkon sa maong ganti nga tinguha sa iyang mga co-finalist angkon.

Aduna pay unom ka gabii nga mahitabong sangka ug paningkamutan ni Tolits nga makalahutay.

“Ang ako lang kay buhaton nako tanan ug dili hikalimtan nga mangaliya daan ni Sr. Sto. Niño before mutungtung sa stage”, pagtapos ni Tolits.