Maka-relax nga Cadaruhan

“I can, we can, Cadaruhan!”

Happy FlyDay Friday mga higala! Laing lugar na sab ang atung laagon karong adlawa. Niining panahona, dalhon mo nako sa usa sa mga baranggay sa usa ka hilom nga dapit sa Borbon, ang Cadaruhan.

Dako nakong kalipay sanglit atol sa paglusad sa opening-salvo sa Daruhan Festival sa Cadaruhan, usa ako sa liboan ka katawhan nga nakasaksi niini.

Mao kini ang labing dakong baranggay nga nahisakop sa lungsod sa Borbon. Ang magarbuhong paglusad gipahigayon atol sa barangay officials night, pinaagi sa pagpili og 1st Daruhan Festival Queen.

Ang lead organizer sa Daruhan Festival nga si Konsehal Alma Mondigo mipadayag nga gituyo ang pag-umol sa maong festival isip pasalamat sa ilang patron  nga si Sr. San Roque.

Abunda ang Cadaruhan sa mga abot gikan sa pang-uma. Ug duna silay lapad nga kaumahan nga gitikad latas sa katuigan.

Ang pag conceptualize sa Daruhan Festival gilangkuban sa mga aktibong opisyal sa barangay.

Si Cadaruhan Brgy. Captain Perpetuo ‘Joy’ Cabello miingon nga wala nay lain nga maghulagway sa ilang baranggay gumikan kay ang ngalan usab niini gikuha man gikan sa Daruhan.

Matud niya  nga dunay dul-an sa gatosan ka  mangdaruhay sa  maong dapit ug daghan gihapon ang mga kabaw.

Ang daruha mismo maoy matawag nga natural nga  pampa-relax ug makasagap og presko nga hangin.

Dugang ni Cabello, makasaysayanon ang pagpahigayon sa Daruhan Festival gumikan kay mao kini ang maghatag og kaikag sa mga katagi baranggay nga magkugi kanunay sa pang-uma nga bisan ang ginagmay’ng bakanteng luna sa palibot ila gyud nga tamnan.

Atol sa atong pagbisita didto mga kahigalaan, nagpahigayun sab sila og Daruhan Festival Queen Competition diin si Gwykneth Dotillos ang gikoranahang labing unang festival queen, gipildi niya ang pito ka nga kandidata.

Ang kinatibuk-ang sakop sa mga baranggay officials midapit sa mga Cadaruhanon ug sa mga dumuduong sa pagsalmot ug pagsaksi sa labing unang grand parade ug streetdancing nga ipahigayon karong adlawa mismo sa ala una sa hapon.