Pia nanalipod kang Vickie

CEBU, Philippines – Ni-post og mensahe sa Instagram  si Miss Universe 2015 Pia Wurtzbach isip pagpanalipod  sa  Bb. Pilipinas 2019 contestant  nga si Vickie Rushton  kinsa gisaway sa ubang netizens gumikan kay matud pa wala kini katarong og tubag sa  Q and A portion.

Nasayran nga nanghakot og daghang  minor awards  si  Vickie sa maong indigay.

Si Daniel Padilla maoy  nipadangat og pangutana kaniya  nga nagkanayon,”Why is mental health as important as physical health?.”

Nitubag dayon si Vickie og, “Mental health is as important as physical health, because of our inner being. Having self-love is important. And as a woman, I can inspire and empower the people to take care of themselves, to take care of their mind as well as their health. Because they will be as effective,” ang naputol niya nga tubag gumikan kay naabtan kini sa oras.

Nipadangay og mensahe si Pia nga dili lalim ang pagsalmot og pageant .

“My heart also breaks for Vickie. I hope she can try again. I believe this girl is smart. Nerves can happen to even the best of us. It’s not easy to compete. Keep your chin up, Vickie,” suma pa ni Pia .

Kyline na-starstruck kang Cherie

Wala dayon katingog si  Kyline Alcantara sa dihang nahimamat niya sa personal si  Cherie Gil,

Si Kyline maoy host sa online show sa StarStruck , samtang hurado usab niini  si Cherie,   Heart Evangelista ug  Jose Manalo.

 “Kasi, first time ko po siyang na-meet. Na-starstruck po ako!,” matud pa ni Kyline.

Pangandoy ni Kyline nga masagpaan sa kamot ni Cherie.   

Wala’y medical team

Giimbestigar karon sa GMA Network  ang sitwasyon sa set sa teleseryeng Rosang Agimat  nga matud pa walay medical team atol sa taping kun diin naaksidente  si Eddie Garcia.

“It has been the network’s practice to have medical personnel and ambulance crew on standby whenever the production is executing big action scenes during taping. This has been likewise the practice of other GMA programs. Given this, we are currently investigating the absence of a medical team on the set last Saturday, June 8,” tipik sa statement sa GMA-7.

Kritikal gihapon ang kondisyon karon ni Eddie.

“GMA Network is deeply saddened with what happened to Mr. Eddie Garcia and the management is committed to getting to the bottom of this unfortunate incident,” dugang pa sa GMA.

Nakabaton og fracture ang  liog sa aktor  ug padayon kini nga giobserbahan sa mga doktor.

Kapamilya movies molugwa sa China

Maglawig sa China  ang pipila ka Kapamilya movies  pinaagi sa Phoenix Movie Channel.

Mosikad na kini  karong September  ug usa na niini mao ang 2016 box office hit nga “Barcelona: A Love Untold” nga gibidahan nila ni Kathryn Bernardo ug Daniel Padilla.

 Molugwa usab sa maong channel ang  “Four Sisters and a Wedding,” “My Ex and Whys,” “You’re My Boss,” “Everything About Her,” ug  “Can’t Help Falling In Love.”

Pasok usab ang  “Love You To The Stars and Back,” “Dear Other Self,” “My Perfect You,” “To Love Some Buddy,” “Can We Still Be Friends,” “Always Be My Maybe” ,“The Achy Breaky Hearts”,  “First Love”, “Kasal” ug  “Hihintayin Kita sa Langit.”

Michael Bolton makatrabaho ni Morissette

Nagpadayon ang paglawig sa Sugbuanon nga singer nga  si  Morissette Amon sa  international scene.

Makatrabaho ni Morisette  ang multi-awarded singer-songwriter  nga si Michael Bolton sa usa ka reality talent show.

Gawas sa maong proyekto, gisugdan na usab ang   iyang recording  nga mugna sa  US with Grammy-winning producer nga si  Rhett Lawrence .

Dili pa lang dugay, nakabaton usab og mga pagdayeg ang version ni Morissette sa  “A Whole New World” kun diin ka-duet niya si  Darren Espanto .

Carmina miatras sa The Heiress

Dili madayon ang partisipasyon  ni  Carmina Villarroel sa horror movie nga  The Heiress nga pagabidahan nila ni Maricel Soriano ug Janella Salvador.

Nasayran nga excited na gyud unta si Carmina sa maong pelikula ug nakatambong pa siya sa storycon niini.

Apan  nakabaton og  conflict sa dihang nasayran niya nga  target sa  Regal Entertainment Inc. nga isalmot ang  The Heiress sa Metro Manila Film Festival .

Matud pa ni Carmina nga basin makabaton og conflict sa iyang schedule sanglit aduna na siya’y gisanong nga laing horror movie nga   nag-ulohan og “Sunod “  nga plano pud nga isalmot sa MMFF.  

Matinabangon gyud

Bisan pa man sa ka-busy ni  Alden Richards sa iyang showbiz career ug negosyo, dili gyud niya kalimtan ang pagahin og oras sa mga charity event.   Ang pagsukli og kaayohan sa katawhan maoy  magsilbi niya nga pasalamat sa tanang grasya nga iyang nadawat.

Lahi og putahi

Lahi ang mugna sa  umaabot nga pelikula nila ni  Alessandra de Rossi ug Empoy Marquez .  Bag-ong putahi ang idalit sa maong proyekto aron dili mapul-an ang mga tawo sa ilang tandem. Nagkauban na kaniadto sila si Alessandra ug Empoy sa pelikulang Kita Kita.

Giintriga ang relasyon

Gipanalipdan   ni Jimuel Pacquiao ang uyab niya nga si Heaven Peralejo kinsa gitawag og “gold digger” sa iyang bashers.    Matud pa ni Jimuel nga walay katungod ang ilang bashers nga hukman ang ilang relasyon.  Matud pa niya nga maayo nga pagkatawo  si Heaven.

Naneguro sa kaugmaon

Todo tigom gyud si Alex  Gonzaga sa iyang kinitaan  samtang naa pa siya’y stable nga income karong panahona.  Malipayon  si Alex  gumikan kay   kusog kaayo ang iyang vlog. Aktibo usab si Alex sa pagkanta.

Nanagop og iring

Mahiligon si  Sandara Park og iring. Niabot  na og unom ang binuhi nga iring ni Sandara  ug ang uban niini  nakit-an lang niya sa kadalanan ug iyang gisagop. 

Midepensa ang uyab

Gipanalipdan  ni Jason Abalos ang iyang  uyab nga si Vickie Rushton kinsa gi-bash gumikan kay matud pa wala  kini katarong og tubag atol sa koronasyon sa Bb. Pilipinas 2019. Matud pa niya nga dili makiangayon nga sawayon ang iyang uyab   ug dili matud pa lalim ang pagtungtong sa entablado.  Gipasigarbo niya si Vickie gumikan kay gibuhat gyud niini ang tanan aron lang gyud mahimong tulin ang pagsalmot niini sa maong indigay.

James isnabero?

Tsika pa sa kanhi beauty queen nga si Patty Betita nga nakauyon gyud siya kang Daniel Padilla gumikan kay wala kini daghang arte  sa dihang nagpa-picture siya niini.  Sa dihang gipangutana siya sa iyang follower kun nganong wala siya nagpahulagway kang James Reid, nitubag siya nga dili friendly si James.

Motingog gyud

Dili ra ikaulaw ni Enchong Dee ang iyang pagka-vocal sa social media kalabot sa  mga isyu sa politika. Suma pa sa aktor nga kinahanglan gyud nga motingog  ilabi na sa mga butang nga dili na makiangayon.

Makauban si Direk Paul

Subling makatrabaho ni  Jericho Rosales si Direk Paul Soriano. Excited na si Echo sa umaabot niya nga pelikula ug komportable ra siya sanglit suweto naman siya sa direktor nga nakatrabaho niya kaniadto sa pelikulang Siargao.

Okay lang

Dili big deal alang kang Loisa Andalio ug  Ronnie Alonte kun buwagon na ang ilang tandem. Ang labing importante kanila nga duna sila’y mga proyekto.  Isip  mga artista, nasayod na sila dagan sa ilang trabaho.

Naa pa

Gihimakak ni  Jose Manalo nga hingpit na gyud nga bungkagon ang tandem nila ni Maine Mendoza ug Alden Richards sa noontime show  nga Eat Bulaga.  Duna gihapoy mga higayon nga magsalo sa entablado sila si Maine ug Alden.