Nheil Perez artista na!

CEBU, Philippines - Gisudlan na ni Mr. International 2013 Nheil Perez ang natad sa pag-arte. Ang ambongan nga police unang makit-an nga muarte pinaagi sa TV5 Wattpad Presents My Ex, My Professor diin pares niya si Isabelle de Leon. Suma pa ni Perez naglisud matud pa siya sa maong project sanglit wala siya nag-agi og workshop. Mulugwa na kini sa TV5 karong March 23.

Hunahunaon na

Napul-an na matud pa si Megastar Sharon Cuneta nga sulod sa 30 ka tuig, kanunay siyang gipangutana kun musulod ba siya sa politika, ilabi na ang magpapili isip mayor sa Pasay City. Hinungdan nga aron bag-o na sab matud pa iyang tubag, siya nilenggua og “I will have to think about it.”

Dili bayot

Giklaro ni Benjamin Alvez nga sigurado matud pa siya sa iyang sexual orientation. Namahayag si Benjamin niini taliwala sa pagduda nga bayot siya ug nisamot pa sanglit tulo na siya ka tuig nga single. Matud sa maong Kapuso talent wala matud pa siya magdali nga musulod og relasyon.

Hands on dad

Gipadayag ni Cristine Reyes pinaagi sa iyang Instagram account ang iyang dakong kalipay gumikan kay “hands on dad’ matud pa si Ali Khatibi nga maoy amahan sa iyang anak. Niadtong nilabay nga adlaw nag-upload si Cristine og hulagway ni Khatabi nga nagkugos sa ilang anak nga may caption nga panahon na matud pa nga matulog siya kay ang daddy na sab sa bata ang mubantay niini.

Deadma na lang

Dili matud pa apektado ang panaghigalaay nila ni Daniel Padilla ug Vice Ganda taliwala sa pagpunay og pangaway sa KathNiel fans sa nahisgutang TV host. May labot kini sa paglugwa sa KathNiel sa show ni Vice diin wala nahimuot ang fans kay matud pa mubo ra kaayo ang exposure sa ilang idols. Matud ni Vice may pipila nga nag-sorry na niya, apan aduna gihapoy nagpunay og pangaway busa deadma na lang. Suod matud pa sila ni Daniel, nga mura na og pag-umangkon niya ang “Teen King” busa dili apektado ang ilang kasuod.