Kapuso gihapon

CEBU, Philippines - Mi-renew sa iyang exclusive contract kagahapon sa GMA Network ang box-office actor ug public servant nga si Senator Bong Revilla. Duha ka tuig nga kontrata ang subling gipirmahan ni Bong.

Mitambong sa contract signing sila si (gikan sa wala) Lolit Solis (Bong’s manager), GMA President and Chief Operating Officer Gilberto R. Duavit, Jr., Bong Revilla, GMA Chairman and Chief Executive Officer Atty. Felipe L. Gozon ug GMA Entertainment TV’s Officer-in-Charge Lilybeth G. Rasonable.

Inday Gemma magbabu na!

Gikumpirmar sa usa sa mga inila nga disc jockey sa Sugbo nga si Inday Gemma ang migawas nga mga hungihong sa miaging adlaw nga kutob na lang siya karong Disyembre 31 sa 99.5 RT Nindota Ah!.

Suma pa niya nga siya gyud ang mihangyo sa mga kadagkoan sa istasyon nga dili na siya mo-renew.

“Dili na gyud kaya sa akong powers,” mao kini ang iyang mubong tubag sa dihang gipangayuan og katin-awan sa Banat News Hugyaw kagahapon sa hapon pinaagi sa telepono.

Nagdumili si Inday Gemma sa pagbutyag sa kinatibuk-ang rason basta mapasalamaton siya sa dyRT nga natagaan siya og exposure sa kahanginan ug usa kini sa mga rason nga nahimo siya nga inila ngadto sa masa.

Usa sa kamingawan unya niya mao ang pagmata og alas dos pasado sa kadlawon sanglit alas kwatro man sa kadlawon ang iyang programa diin siya maoy mamukaw sa publiko pinaagi sa makahugyaw niya nga mga komedya.

Matud pa ni Inday Gemma nga kapin na sa duha ka tuig ang iyang pagtingog-tingog sa dyRT busa segurado nga mingawon gyud siya pag-ayo sa iyang mga listeners.

Ang kadlawon nga timeslot maoy gihuptan ni Inday Gemma sukad siya nagsugod sa nahisgutang estasyon.

Naglaraw siya nga mosuway og laing matang sa trabaho sunod tuig apan kung dunay tanyag ang ubang istasyon, iyaha kini nga dawaton ug nagdepende kung kaya ba sa iyang “powers.”

“Ganahan na pud ko makasuway og laing work, seguro kung dunay maayong offer nga atong madawat, ato nang suwayan, “ nagkanayon si Inday Gemma.

Una niini, mibiya na pud sa maong estasyon si Papa Rachi gumikan kay nagnegosyo na kini.

Craig gibakwi ang minaldito batok Kristen

CEBU, Philippines - Gibakwi ni Daniel Craig ang una niyang pamahayag nga dili angayan mamahimong Bond girl si Kristen Stewart.

Si Daniel kinsa katulo na makagama og James Bond movie ug gitakda nga magbida sa lain pang duha ka pelikula sa sikat kaayo nga British spy film miingon nga namahayag lamang matud pa siya og ingon niadto gumikan kay dungan nga mibukas sa mga sinehan ang ilang pelikula ni Stewart.

Una niini, gipadayag ni Stewart nga interesado siya nga mu-audition aron mamahimong Bond girl, busa gipangayuan og reaksyon si Daniel niini kinsa mitubag og, ‘Would she make a good Bond girl? No, she’s in ‘Twilight’.’’

Apan iya kining gibakwi sa interview sa ‘The Kyle and Jackie O Show’ didto sa Australia: ‘’No, I’m being nasty. It’s only because the film (‘Skyfall’) is coming out at the same time (as ‘Breaking Day - Part 2’), we’re in direct competition. I’m sure she’d make a great Bond girl.’’