Wa magkasinabot? Kalunasan festival queen

CEBU, Philippines - Naukay ang pipila ka staff sa Psalmstre Enterprises kalabot sa ilang nasinati sa Festival Queen Night sa Barangay Kalunasan niadtong Hunyo 9, sa gabii sa sports complex sa maong dapit.

Suma pa nga sayo kaayo nangabot ang mga team sa Psalmstre sanglit sila maoy presentor sa pipila ka mga awards sama sa Ms. New Placenta, Ms. Olive-C ug Ms. Glutamin ug nasabutan nila nga mahimong hurado, lakip na ang designer ug pageant director nga si Lemuel Rosos.

Nakugang na lang sila gumikan kay 10 minutos sa wala magsugod ang show, dunay nangabot nga laing set sa mga hurado.

“Ang among punto, kay na-shock na lang mi kay wala mi gi-inform nga duna diay laing judges unya nagdala og score sheets,” suma pa sa representante sa Psalmstre Enterprises nga si Miza Sabroso.

Dugang pa ni Sabroso nga dili diay unta ang Festival Queen ang ilang sponsoran. Sa suwat nga ilang nadawat, ang Mr. and Ms Kalunasan gyud unta ang ilang tagaan og suporta apan gibalhin sila sa Festival Queen gumikan kay duna na’y laing kompaniya ang nagpaluyo niini isip presentors.

Gumikan sa hangyo sa mga organizer sa maong kalihukan, misugot sila nga mopaluyo sa festival queen.

“What a surprise!!!!! We arrived early with our staff to witness, and ready to choose whom we will give our corporate awards namely: Ms. New Placenta, Ms. Olive C and Ms. Glutamin. Mr. Lemuel Rosos also arrived and have a moment while waiting for the event to start…10 mins before the show, new set of judges (5) arrived and they are the one judging the event without approaching us or informing us that we are not included for the event as a judges. Bastosan ang show di ba?” padayag ni Sabroso pinaagi sa FB kagahapon.

Samtang ang chairman on entertainment sa konseho sa Barangay  Kalunasan nga si Marvin Leyson misaysay  nga duna la’y ginagmay nga “miscommunication”  ug nangayo siya og despensa sa Psalmstre Enterprises.

Matud pa ni Leyson nga himuon gyud niya og hurado ang taga Psalmstre niadtong higayona apan na-late kini og abot base sa “call time” nga ilang gihatag sanglit duna may pre-judging. Gipasalig sa konsehal nga dili na mausab ang maong hitabo.

“Actually himoon gyud nako sila og judge pag-abot nako, wala naman sila,” suma pa ni Leyson.

Hinuon, bukas ang kampo ni Sabroso nga makighinabi sa organizer sa maong kalihukan….