Nadia "sulsoltant" ni Gabby

Wala magpada si Mommy Rose Flaminiano kalabot sa isyu nga iapil niya sa pagdemanda si Nadia Montenegro tungod kay matod pa ang nahisgutan ang tig-sulsol karon kang Gabby Concepcion. “Ano naman ang makukuha ko sa kanya, eh di puro mantika?”

Gihulagway ni Mommy Rose nga “sulsoltant” si Nadia tungod sa pagpunay niini og tambag ngadto ni Gabby hinungdan nga matud pa nausab na ang aktor. Samtang, wala usab hatagi og igong pagtagad sa nahisgutang manager ang paglambigit ni Pops Fernandez ngadto sa actor nga matod pa ang actress karon ang tigpadayag og mga pahimangno ngadto ni Gabby. “Si Pops, napaka-tahimik niyan, eh. Wala naman akong naririnig na sinasabi niya, wala akong nahuli. In fact, marami ang nagsasabi sa akin na sinasabi niya kay Gabby na ‘hindi ka puwedeng kumalas kay Mommy Rose, kontrata ‘yan, eh.” “Ngayon ‘yung mga personal na bagay nilang dalawa, sa kanila na lang,” matod sa manager nga daw adunay gusto nga ipaambit sa kadaghanan. Hinuon wala nay lain pa nga gisulti si Mommy Rose kabahin sa duha ug giangkon usab niini nga andam niyang pasayloon si Gabby kung sinsero lang kini nga mangayo og pasaylo ngadto kaniya.

Pops Angle

Samtang gihimakak ni Pops ang mga blind items nga nanggawas kalabot sa iyang pagka-link ngadto kang Gabby Concepcion. Matod pa ni Pops nga dili siya gusto nga maapil sa isyu tali sa nahisgutang actor ug sa manager niini nga si Rose Flaminiano. Hinuon giprotektahan ang nahisgutang singer actress ni Mommy Rose atol sa gipahigayon nga presscon diin ang nahisgutang manager ug ang abogado niini nga si Atty. Bonifacio Alentajan ang nagpatawag. Giklaro ni Pops nga managhigala sila ni Gabby apan dili sila close niini ug igo ra siya misugot nga mo-guest atol sa concert niini nga gipahigayon dili pa lang dugay. Samtang, giangkon niini nga hangtod karon, lig-on lang gihapon ang relasyon niini ngadto kang Jomari Yllana.

Millions, more millions

Dungan niini, giyagyag ni Flaminiano sa gipatawag niya nga presscon nga niadtong August 2008 mikita si Gabby og P1.73 million. Kung tungahon ni Gabby ang tanan niyang commitments gitakda siya nga mokita og P2.545 million karong September; P2.16 million sa October; P2.673 million sa November ug P2,047,500 sa December—suma tutal nga P11,155,500. Wala pay labot niini ang trabaho niya sa ABS-CBN, ang Iisa Pa Lamang, nga P3 million matud pa bayad ni Gabby kada buwan. Matud pa ni Mommy Rose, dili na unta niya kini iyagyag pero nasakitan siya sa gibuhat ni Gabby nga gihimoan pa gyud niini og isyu ang P25,000 aron lang makabuhi kini sa ilang kontrata isip talent-manager.

Survivor nauyonan sa viewers

Nakakuha og taas nga rating nga 31.8% ang Survivor Philippines atol sa pilot episode pa lang sa maong show bisan pa man og late na ang timeslot niini apan daghan gihapon ang nag-atang sa paglugwa matag gabii sa nahisgutang reality show. Tsika sa PangMasa nga gitagna kini nga maoy mag-una sa rating sa primetime tungod kay sa sinugdanan pa lang, makita na ang kalisod nga natagamtaman sa 18 ka mga castaways. Matod pa nga sakto gyud ang giingon sa host sa Survivor Philippines nga si Paolo Bediones nga may tagsa-tagsa ka mga character ang maong napilian nga mga castaways. Butyag pa ni Paolo nga angay atangan ang umaabot nga mga panghitabo sa maong show tungod kay mahibaw-an na sa mga televiewers kung kinsa sa maong mga castaways ang mga badlungon, bakakon, ug ang mihimo gyud og paagi aron dili ma-vote out sa isla. “Tapos naman na kasi naming lahat. May two castaways na lang ang natitira pero hindi namin puwedeng i-reveal kung sino ang dalawang iyon. Sa December pa malalaman kung sino sila at sino ang matatanghal na Sole Survivor,” sey ni Paolo.

Sheryn di pa andam manganak

Nagdungan nga mibiya sa nasod kagahapon sila si John Lloyd Cruz, Bea Alonzo ug Sheryn Regis sa “I Love Betty La Fea” alang sa ilang himuon nga show sa Ontario, California nga mahitabo karong umaabot nga September 21. Matod pa ni Sheryn nga excited kaayo siya tungod kay nakauban niya sa pagbiyahe ang mga lead stars sa first dramedy sa kapamilya diin siya ang midala sa papel nga kikay nga sekretarya ni Armando (John Lloyd) ug maoy tig-okray kang Betty. Samtang, giklaro sa nahisgutan nga dili pa siya andam nga sundan ang iyang lima na katuig nga anak tungod sa iyang ka-busy sa trabaho.