Leksyon sa Iron Man

War is business. Mao kini ang nagsigang kamatouran nga buot ipaambit sa mga nagsulat sa pelikulang “Iron Man”. Ug hangtod duna’y mga tawong nalingaw kaayo sa ilang pagne-gosyo parte’g pakiggubat , dili gyod mahuman ni masumpo ang mga “warfare”. Gipamatud-an kini sa lilas nga “Iron Man” nga diin si Robert Downey, Jr. ang bida isip si Tony Stark, usa ka billionaire industrialist/inventor.

Negosyo niya ang paggama og weapons of mass destruction. Sa Project Jericho gipatestingan niya ang mga kahimanang iggugubat nga ginama sa Stark Industries didto sa Jericho Mountains, Afghanistan ug nalipay siya sa makadiyot sa maong kalamboan. Apan sa dihang naunay siya sa iyang kaugalingong tari, wala damha nga mas gipili ni Tony Stark ang pagpasira sa Stark Industries. Nakugang lakip ang media sa maong dakong desisyon nga iyang nakab-ot.

Matag lilas nga atong paga-dugokan may leksyon nga buot isilsil sa atong alimpatakan. Hinaot makaapas pa mo’g tan-aw sa dili pa mo-change program ang mga sinehan kay bisan og sinamboga’g pantasya ang Iron Man, usa kini sa mga salida nga labing angayan natong tan-awon karong panahona nga naghitak ang mga negosyong gipunting ngadto sa pagkatun-as sa mga mahuyang nga kanasoran ug paggara sa mga mapalabi-labihon.

Gipakita ang binilyon ka dolyares nga nausik alang sa pagmugna og mga kahimanang makamatay inay ibulig ang mao kadakong salapi sa pagpalambo sa kinabuhi sa kadaghanan. Gigasto kini aron padayong ipakita kun si kinsa ang adunay superyor nga gahom ning kalibotana. Ang nakaparat kay wala ra ba gyo’y klarong magdaog kun pakiggubat na ang hisgotan. Inig sumada, ang sukli sa pakiggubat mao ang epidemya, pagkatag-katag sa mga katawhan nga nawad-an sa ilang mga pinuy-anan, ug mga bata’g kababayen-an nga mahikawan sa oportunidad nga makaeskuyla ug makatrabaho.

Natagamtam mismo ni Tony Spark ang kabangis sa mga tawong nagdako ug gilawog ngadto sa panggubatan. Maayo na lang gani kay taliwala sa iyang pagkabihag, gigasahan sa katakos nga makaimbento og “iron suit” nga maoy nakatabang niyang makalingkawas sa iyang mga “abductors”, nakalayas gyod si Tony balik sa US. Gigamhan sa kasilag sa tawong mitraydor ug nagsugo nga siya kidnapon, nakat-onan ni Tony ang pait nga bunga sa negosyong iyang gipadagan (gani kabilin-bilin pa kini sa iyang amahan), busa nakahukom siya nga gamiton ang iyang katakos isip imbentor sa pagmugna ni Iron Man aron luwason ang kalibotan sa padayong pagkahitumpawak ngadto sa kadaotan.

Sama sa dakong pagbasol ni Albert Einstein sa dihang naimbento niya ang bomba atomika nga maoy nakapapha sa daghang kinabuhi sa Nagasaki ug Hiroshima niadtong ikaduhang kalibotanong gubat, mao sab ang dakong pagbasol ni Tony sa mga hi-tech nga mga missiles nga iyang gidesinyo nga gigamit alang sa pagpukan dili lamang sa mga sistema sa kanasoran kundi lakip na ang mga damgo, tingusbawan, tinguha’g tumong sa mga lumulopyo sa maong mga kanasoran.

Nagbasol si Tony nga gigamit niya ang iyang pagkautokan sa mga butang nga wala’y kapuslanan. Miabot gyod ang takna nga buot siyang gamiton sa mga nagbihag kaniya aron mapalig-on pa ang ilang pwersa sa natad sa giyera, sa sinukliay - dili lamang sa bala - kundi lakip na’s mga missiles nga tagsa ra’y tugpa, makapanas dayon sa kota sa mga kontra.