Hello Balitang Kris, goodbye TWKA!

Hindi big deal kay Joyce Jimenez kung si Rica Peralejo ngayon ang tinatawag na "Pantasya ng Bayan." "Okey lang ‘yun. Kung siya, eh di siya, hindi ko naman hiningi ‘yung title na ‘yun, sila ang nagbigay sa akin," react ni Joyce before the presscon ng Da Body en Da Guard opposite Aga Muhlach na naka-schedule mag-premiere today, Saturday, March 3, 8:00 p.m. over ABS-CBN.

"Kung gusto nila, sa kanila na lang," Joyce adds na medyo fluent na rin sa pananagalog ngayon.

Lately kasi ay sinasabing si Rica na ang pumalit sa trono ni Joyce bilang "Pantasya ng Bayan" at reyna ng Viva Films.

"Like what I’ve said before, wala na akong dapat i-prove para makipag-compete sa kanya," she explains.

Kunsabagay, sinabi rin naman ni Rica sa previous interview na hindi sila magka-level ni Joyce dahil mas marami na ngang nagawang movie si Joyce na lahat kumita at naniniwala siya (Rica) na hindi siya threat kay Joyce.

Anyway, ang Da Body en Da Guard ang first comedy show ni Joyce Jimenez. "Actually, ngayon lang ako magkakaroon ng chance na mapanood ng mga bata. Kasi everybody knows naman ‘yung mga previous project ko ay for adults only, so hindi talaga nila napapanood. And my niece and nephews, mapapanood na nila ako," she expresses.

Magpapa-sexy siya rito, pero to a certain extent. "Kasi TV naman ‘to eh, hindi puwede ‘yung mga ginagawa ko sa pelikula," she adds.

Base sa observation ng nakararaming present sa nasabing presscon, may rapport sila as in click ang team-up nila. Lagi nilang ginagawang biruan ang pagiging bulol ni Joyce sa pananagalog. Kaya tuloy maraming nag-iisip na baka maging dahilan ang team-up nila para hindi matuloy ang kasal nina Aga at Charlene Gonzales sa May. Pero I doubt. Naka-set na ang mind ni Aga sa kasal nila ni Charlene. Minsan din ay nadalaw ako sa taping ng Da Body en Da Guard at nakita ko ‘yung set-up nila.

Malapit din sa bahay nila Charlene ang location ng taping nila kaya minsan ay may chance na dumalaw si Charlene. Nang dumaan nga kami ay may dalang cake si Mrs. Aga Muhlach to be. Kaya hindi ako naniniwalang makakaapekto sa relasyon nina Aga at Charlene si Joyce.

But Joyce admits na malaki ang possibility na ma-develop siya kung hindi lang naka-schedule na pakasal si Aga. "Most probably. Pero hindi na puwede eh," she says.

Actually, dumating na sa point na akala ng marami ay magiging mag-on sila Aga and Joyce - that was during the time na nag-shooting sila sa Clark para sa kanilang movie. During that time wala pang commitment si Aga. Pero hindi nagkaroon ng chance na ma-develop dahil natigil ang shooting nila at pumasok nga sa eksena si Charlene.

*****

Hanggang 2003 pa ang pardon ni Robin Padilla kaya kailangan niyang maging neutral sa nangyayari sa pamahalaan. "Kailangan kung sumunod dahil kung hindi ikukulong uli nila ako," he says sa presscon ng Ooops... Teka Lang opposite Claudine Barretto under Star Cinema.

In fact, kailangan pa rin niyang mag-report kung ano ang ginagawa niya sa kanyang officer-in-charge twice a month. Kailangan pa rin niyang mag-secure ng permit to travel kung lalabas siya ng bansa. "Hindi pa ako totally malaya, parolado pa ako."

At habang tumatagal, lalong tumitibay ang paniniwala ni Robin sa Islam. Sa katunayan plano nilang magtayo ng foundation - Light and Peace Foundation na para sa mga kabataang Muslim sa Mindanao na hindi nagkakaroon ng pagkakataon na makapasok sa eskuwelahan. Gagawa sila ng sariling curriculum.

Anyway, hanggang ngayong ay nasa Australia pa rin ang family niya. "Pero everyday naman kami nag-uusap over the phone. Lahat ng nangyayari, sinasabi nila sa akin everyday," he says.

At any rate, follow-up movie ni Robin ang Ooops...Teka Lang ng Kailangan Ko’y Ikaw.

*****

Confirmed na lilipat si Kris Aquino sa Balitang K na magiging Balitang Kris ka back-to-back ni Korina Sanchez sa TV Patrol.

Ayon sa isang source ng Baby Talk, kukunin ng News and Current Affairs ang 11:00 a.m. slot na iiwan ng Today With Kris Aquino.

Dahil 30 minutes lang ang Balitang K, bibigyan daw ng sariling radio show si Kris sa DZMM.

Well, sayang ang TWKA, pero siguro nag-isip si Kris na habang top rating pa ang show niya ay palitan na dahil nga unti-unti na silang nauubusan ng topic na tatalakayin everyday.

*****

Nag-deny ang mommy ni Rica Peralejo na on na nga ang anak niya at si Bernard Palanca na magkasama sa Sa Huling Paghihintay.

Ayon sa mommy, as far as she know, wala pang relasyon ang dalawa.

Pero kung si Mommy Alice ang tatanungin, favor siya kay Bernard para kay Rica.