Alapag sasagupa sa dating tropa

MANILA, Philippines — Lalabanan ni PBA le­gend Jimmy Alapag ang tropang tinulungan niyang makakuha ng anim na PBA championship.

Sasagupain ng NLEX ang nagdedepensang Tropang 5G ngayong alas-7:30 ng gabi matapos ang upakan ng guest team Macau at Titan Ultra sa alas-5:15 ng hapon sa PBA Season 50 Governors’ Cup sa Ninoy Aquino Stadium sa Malate, Manila.

Sa paggiya ng 48-an­yos na si Alapag ay uma­rangkada ang Road Warriors sa 5-0 record sa Group A kasunod ang San Miguel Beermen (4-2), Tropang 5G (3-2), Converge FiberXers (3-3), Giant Pandas (2-4), Terrafirma Dyip (2-4) at Giant Risers (1-5).

Nangunguna sa Group B ang Phoenix Fuel Masters tangan ang 4-1 kartada sa itaas ng Rain or Shine Elasto Painters (4-2), Barangay Ginebra Gin Kings (2-3), Magnolia Hotshots (2-3), Blackwater Bossing (2-3) at Meralco Bolts (2-4).

Si Alapag ay bahagi ng anim na korona ng TNT at naglaro sa PLDT franchise simula noong 2003 hanggang 2015.

Huling biniktima ng NLEX ang Converge, 119-107, kung saan umiskor si balik-import DeQuan Jones ng 28 points at may 24 markers si Schonny Winston.

“We’ll stay humble, knowing it’s still a long season to go and there’s a lot of hard work to do,” sabi ni Winston.

Tumakas naman ang TNT sa SMB sa overtime, 93-89, tampok ang pag­lalaro ni balik-import Rahlir Hollis-Jefferson, habang wala pa sa aksyon sina injured key players Jayson Castro, RR Pogoy, Calvin Oftana at Kelly Williams.

Sa unang laro, target  ng Macau ang kanilang pa­ngatlong dikit na panalo sa pagharap sa Titan Ultra.

Samantala, pinalagan ng Meralco ang pagtawag ni Rain or Shine coach Yeng Guiao kay veteran forward Cliff Hodge na ‘dir­tiest player in the league’.

Ito ay matapos ang banggaan ng mga tuhod ni­na Hodge at Elasto Pain­ters guard Adrian Nocum sa third period.