No. 2 most wanted sa Calabarzon timbog sa kidnapping

MANILA, Philippines — Naaresto ng mga operatiba ng pulisya ang isang nakatalang number 2 most wanted criminal sa Calabarzon sa kasong kidnapping sa isinagawang manhunt operation sa San Pedro City, Laguna nitong Martes ng gabi.

Kinilala ni Laguna Provincial Police Office acting director P/Col. Gauvin Mel Unos ang akusado na si alyas “Michael” residente ng San Pedro City, Laguna.

Sa ulat ni P/Lt. Col. Tyrone DG Valenzona, hepe ng San Pedro Component City Police Station, nagsagawa ng manhunt operation ang warrant personnel ng kanilang tanggapan laban sa akusado  sa Brgy. San Vicente, San Pedro City, Laguna bandang alas-8 ng gabi.

Ikinasa ang manhunt operation sa bisa ng warrant of arrest na inilabas ng Regional Trial Court Branch 170, San Pedro City, Laguna, na nagresulta sa pagkakaaresto ni alyas “Michael” na nahaharap sa kasong kidnapping na walang inirekomendang piyansa ang korte.

Nasa kustodiya ng San Pedro City Police Station ang nasakoteng wanted.