NPA na may P4 milyong patong sa ulo, 3 pa nasukol
POLANGUI, Albay, Philippines — Hindi na nakapalag ang commanding officer ng Bicol Regional Party Committee ng New People’s Army (NPA) na itinuturing na “most wanted person” ng rehiyon na may patong na P4 milyon sa ulo at tatlong kasama matapos na maaresto makaraang takasan ang inilatag na police checkpoint sa motorists assistance center sa Brgy. Matacon, bayang ito, kamakalawa ng madaling araw.
Nakakulong na sa custodial facility ng Polangui Municipal Police Station si Reynaldo Tugado Hugo, may mga alyas na “Ka Evan, Yulo, Bermas, Aster, Julian, Pitoy, Alex, Bitoy”, 61-anyos, BRPC Execom member ng Communist Party of the Philippines-National Operational Command, residente ng Brgy. San Juan, Bato, Camarines Sur at may monetary reward na P1 milyon para sa kanyang ikahuhuli, ayon sa DND-DILG order of reward No.17-2019.
Kalaboso rin sina Bryan Naje Llovit, 42-anyos; Jeane Pastrana Recuenco, 42-anyos; kapwa residente ng Purok-2, Brgy.Travesia, Guinobatan, Albay; at Vanessa Nocomora Avila, 25-anyos, kasapi ng Execom BRPC, at residente ng Brgy. Hubo, Pasacao, Camarines Sur.
Sa ulat, dakong alas-12:53 ng madaling araw sakay ng Toyota Avanza (VFK-563) ang apat patungo sa direksyon ng Camarines Sur nang parahin sa checkpoint na inilatag ng mga kasapi ng Criminal Investigation Detection Group- Albay Field Unit bilang lead unit, kasama ang mga tauhan ng Polangui Municipal Police Stations, 1st Provincial Mobile Force Company, Provincial Intelligence Unit, Regional Intelligence Division 5, Military Intelligence Group, at mga sundalo mula sa 49th Infantry Battalion, 9th Infantry Division ng Philippine Army.
Gayunman, sa halip na tumigil ay mabilis na humarurot ang sasakyan ng mga suspek dahilan para magkaroon ng habulan hanggang sa makorner ang apat sa kahabaan ng Maharlika National Highway sa Brgy. Balangibang ng naturang bayan.
Kasamang inaresto ang tatlo pang kasama ng NPA official matapos na makuhanan ang loob ng kanilang sasakyan ng isang M16 armalite rifle, isang kalibre 45 pistola, mga magazine at bala ng naturang mga baril; isang fragmentation grenade; isang rifle grenade; electrical wire; at dalawang magazine ng 7.62 mm assault rifle.
- Latest
