Magsasaka rumaket sa pagtutulak, tiklo sa P.9 milyong shabu at marijuana
BAYOMBONG, Nueva Vizcaya , Philippines — Isang magsasaka na rumaraket sa pagtutulak ng droga ang nadakip ng mga awtoridad sa isang drug buy-bust operation sa Barangay Paitan sa bayan na ito kamakalawa ng umaga.
Kinilala ni Investigation Agent Jojo Gayuma, provincial officer ng Philippine Drug Enforcement Agency (PDEA)-Nueva Vizcaya ang nadakip na suspek na si James Baltazar, 33, residente ng Brgy. Sunlife, Naguillian, Isabela.
Nadakip si Baltazar matapos kumagat sa buy-bust na inilatag ng pinagsanib na puwersa ng PDEA Nueva Vizcaya at Ifugao, kabilang na ang Bayombong Police sa Caliguis Quary site, Purok 4, Barangay Paitan dakong alas-10:25 ng umaga.
Nakuha sa suspek ang 4-plastic sachets na naglalaman ng hinihinalang shabu na may timbang na 30 gramo at tinatayang nasa P204,000 ang halaga.
Bukod sa shabu, nakuha rin sa suspek ang 5-bricks ng marijuana na may timbang na 5 kilo at nagkakahalaga sa P600,000, habang 2 tig-kakalahating kilo pang hiwalay na marijuana bricks na nasa P120,000 naman ang halaga ang narekober din ng mga awtoridad.
- Latest