Lolo, 31 beses sinaksak sa kubo
SANTIAGO CITY, Isabela , Philippines — Naliligo sa sariling dugo at patay na ang isang 65-anyos na lolo nang matagpuan matapos pagsasaksakin sa kanyang kubo sa Barangay Fugu, bayan ng Jones ng lalawigang ito kamakalawa.
Kinilala ng Jones Police ang biktima na si Diosdado Buenafe, isang magsasaka at residente sa nabanggit na lugar.
Napag-alaman na dakong alas-9:00 ng umaga nang ipaabot sa himpilan ng pulisya ang karumal-dumal na sinapit ng biktima matapos madiskubre mismo ng kanyang anak ang bangkay ng biktima na nakahiga sa duyan sa loob ng kubo.
Noong una ay inakalang nagpakamatay ang biktima subalit nang siyasatin ang kanyang bangkay ng pulisya ay nakita ang nasa 31 na saksak sa iba’t ibang bahagi ng kanyang katawan.
Palaisipan ngayon sa pamilya at sa mga imbestigador kung sino ang responsible sa krimen at kung ano ang motibo sa pagpatay.
- Latest