Kumasa sa raid, wanted todas

MATALAM, North Cotabato, Philippines — Patay ang isang wanted person matapos umanong manlaban sa mga pulis na magsisilbi lang ng warrant of arrest laban sa kanya sa Purok Poinsettia, Poblacion ng bayang ito kamakalawa.

Kinilala ni Matalam Police chief Major Junrel Amotan ang napatay na si Joharie Sati Sabal alyas Alsati Gariano Sabal, 44 years old, may asawa, magsasaka na taga-Purok Krislam, Poblacion.

Sa ulat, minamaneho ng suspek ang motorsiklo nito nang habulin ng mga pulis pero imbes na sumuko ay pinaputukan pa umano nito ang arresting team dahilan ng shootout dakong alas-3:00 ng hapon. Dinala pa sa ospital ang suspek pero ‘di na umabot nang buhay dahil sa mga tama ng bala sa katawan.

Si Sabal ay nahaharap umano sa kasong attempted homicide, illegal possession of explosives at illegal drugs. Narekober sa crime scene ang isang caliber .45 pistol na may mga bala.