2 parak tiklo sa sabungan
TUGUEGARAO CITY, Cagayan, Philippines — Dalawang pulis ang dinampot ng kanilang mga kabaro matapos matiklong pumupusta sa loob ng sabungan sa Brgy. Bagumbayan, Tuao, Cagayan noong Linggo.
Kinilala ni Cagayan Police Director Colonel Ariel Quilang ang mga inaresto na sina Police Master Sergeant Victor Angoluan, 41, nakatalaga sa 2nd Provincial Mobile Force Company sa Camp Tirso Gador at P/Master Sgt. Robert Fernando, 31, na kasapi ng Calayan Police Station sa lalawigang ito.
Ayon sa report, dakong alas-2:45 ng hapon nang matiyempuhan ng Regional Integrity Monitoring and Enforcement team ang dalawang pulis na magkasamang nakikipagsigawan ng pusta sa loob ng sabungan sa Lakay Kiko Mamba Memorial Coliseum.
Sinabi ni Quilang na ang operasyon ay bahagi ng umiiral na internal cleansing activities ng pulisya na nagbabawal sa kanilang mga kasaping pumasok sa mga pasugalan at bahay aliwan.
- Latest
