Drug ops sa Cavite: 2 tigok, 3 tiklo
MANILA, Philippines — Tumimbuwang ang dalawang drug suspects habang naaresto ang tatlong kasamahan ng mga ito sa isinagawang drug-bust operation ng mga otoridad sa Brgy. Molino 4, Bacoor City, Cavite, kamakalawa ng gabi.
Ang mga napatay na suspek ay sina Narciso Briggs, 38-anyos at Leonard Imas, 37, kapwa residente ng Citihomes Subdivision sa naturang lugar.
Sa kalaboso naman ang bagsak ng tatlong kasamahan ng mga napatay na suspek na sina Roland Tabing, 46; Paulo Ramos, 30; at Richard Balakit, 31; pawang nasa watch list ng mga pulis.
Sa nakalap na ulat, isang malawakang buy-bust ang ikinasa ng mga otoridad dakong alas-10:30 ng gabi sa nasabing lugar target ang mga suspek hinggil sa talamak na pagtutulak ng mga ito ng droga sa kanilang lugar at karatig bayan.
Habang isinasagawa ang transaksyon ay nakatunog umano ang mga suspek na pulis ang kanilang ka-deal kung kaya nagtatakbo ang mga ito at nakipagbarilan sa mga pulis.
Makaraan ng ilang minutong habulan at barilan ay bumulagta sina Briggs at Imas habang naaresto naman ang tatlong kasamahan.
Narekober sa mga ito ang ilang sachet ng shabu na di pa mabilang ang timbang, drug money at drug paraphernalias.
- Latest
