68-anyos na ama pinabulagta ng anak
CAVITE , Philippines — Patay ang isang 68-anyos na ama matapos barilin ng sariling anak sa kasagsagan ng kanilang mainitang pagtatalo sa loob ng kanilang bahay sa Parklane Subd., Brgy. Santiago, Gen. Trias, ng lalawigang ito kamakalawa ng gabi.
Hindi na umabot pang buhay sa ospital ang biktima na si Glicirio Montilla, ng Phase 8, Blk 12, Parklane Subd., Brgy. Santiago Gen. Trias City.
Kusang loob namang sumuko sa pulisya ang anak ng biktima na si Johnny Montilla, 33, may asawa, residente ng Sitio Bagong Silang, Brgy. Santiago, Gen. Trias City.
Sa imbestigasyon ng pulisya, alas 9:30 ng gabi nang maganap ang insidente sa bahay ng biktima nang magpunta doon ang suspek at nakipag-usap sa ama. Bigla umanong nauwi sa mainitang pagtatalo ang usapan nang mapikon ang anak sa panenermon at paninigaw ng ama hanggang sa kumuha ang una ng baril at agad na pinaputukan ang huli na duguang bumulagta.
Mabilis na isinugod sa ospital ang biktima pero idineklarang patay habang ang suspek ay kusang loob na nagtungo sa istasyon ng pulisya at sumuko.
Nahaharap sa mga kasong parricide at paglabag sa Comelec Resolution 10247 ang nasabing suspek.
- Latest
