13 bayan, 1 lungsod sa Capiz lubog sa baha
MANILA, Philippines - Umaabot sa 13-bayan at isang lungsod sa Capiz at Aklan ang lumubog sa tubig-baha dulot ng malakas na buhos ng ulan sa pananalasa ng bagyong Seniang sa Visayas Region, ayon sa ulat kahapon.
Sa ipinalabas na data ng Office of Civil Defense (OCD) Region VI, pitong lugar ang apektado ng tubig-baha sa lalawigan ng Capiz kabilang ang Roxas City, mga bayan ng Maayon, Panit-an, President Roxas, Dumarao, Sigma, at ang bayan ng Mambusao.
Aabot naman sa 43 barangay ang dumaranas ng mga pagbaha dulot ng malalakas na pag-ulan simula pa noong Lunes.
Kabilang sa mga naapektuhan ay ang 15 barangay sa bayan ng Mambusao kung saan naapektuhan din ang mga taniman ng palay at gulay.
Ilang pangunahing kalsada rin ang hindi madaanan sa mga Barangay Guinotos at Janguslub sa bayan ng Dumarao dulot ng tubig-baha.
Samantala, lubog din sa tubig-baha ang mga Barangay Poblacion Ilawod, Fernandez, Salgan, Poblacion Ilaya, Palaguian, Tapulang, at ang Barangay Piña kung saan naapektuhan ang mga palayan at maging ang iba pang mabababang lugar.
Apektado rin ng tubig-baha na umabot sa tuhod hanggang baywang sa mga bayan ng Alvatas, Balete, Bulwang, Numancia, Madalag at bayan ng Libacao.
- Latest
