Dyipni hulog sa ilog: 20 sugatan

MANILA, Philippines - Dalawampu-katao ang nasugatan matapos na mahulog ang pampasaherong dyipni mula sa tulay sa Barangay 9, bayan ng Tigbauan, Iloilo kamakalawa ng hapon. Bandang alas- 5:30 ng hapon habang bumabagtas ang pampasaherong jeepney (FEW-924) ni Jose Rolly Feldad nang mahulog ito sa Sibalom Bridge kung saan nagtuluy-tuloy sa ilog. Nabatid na nawalan ng kontrol sa manibela ang driver ng jeepney kaya sinalpok nito ang barandilya ng tulay hanggang sa mahulog ito sa mula may 10 talampakang taas na tulay. Bunga nito ay nasugatan ang driver at ang 19 nitong pasahero na pawang isinugod sa Guimbal District Hospital. Samantala, bunga naman ng malubhang sugat na tinamo ng retiradong guro na si Sonia Florendo ng Miag-ao , Iloilo ay inilipat ito sa Western Visayas Hospital sa Iloilo City.