Ambulansya swak sa bangin: Mag-utol patay

LEGAZPI CITY, Albay, Philippines – Magkasunod na sinundo ni kamatayan ang magka­patid na lalaki makaraang magpagiwang-giwang ang ambulansyang sinakyan at mahulog sa malalim na bangin sa Sitio Balongbong, Barangay Sibacungan sa bayan ng Bato, Catanduanes kamakalawa ng gabi.

Hindi na umabot ng buhay sa Eastern Bicol Medical Center ang mga biktimang sina Joey Cab­rera, 27, binata; at Tito Cabrera, 42, may asawa; mga residente ng Barangay Antipolo sa bayan ng Bagamanoc, Catanduanes habang sugatan namang driver na si Santos Cab­rera, 54.

Batay sa police report, ihahatid sana ng matandang Cabrera ang kanyang utol nang magkaaberya ang makina ng ambulansyang minamaneho ng kanyang pinsang si Santos pagsapit sa nasabing lugar.

Dito nawalan ng kontrol sa manibela ang driver  at nagpagiwang-giwang ang ambulansya saka nagtuluy-tuloy sa bangin.

Naisugod naman sa ospital ang mga biktima subalit namatay ang mag-utol habang malubha naman ang driver ng sasakyan.