Paslit kinatay, sinunog ng GF ng ama

STA. MARIA, Bulacan , Philippines  — Kalunus-lunos ang sinapit ng isang anim na taong gulang na batang ba­bae na natagpuang tad­tad ng saksak sa katawan at sinunog pa sa utos ng kina­kasama ng kanyang ama sa Brgy. Bulac sa bayang ito kamakawala ng hapon.

Kinilala ni P/Supt. Mar­cos Rivero ang biktima na si Alyssa Mae Perez, na nag­tamo ng 12 saksak sa ka­­tawan habang agad na­mang tumakas ang suspek na si Lilia Diño, 60, may-ari ng isang videoke bar at residente ng Sitio Paigkas, Brgy. Bulac sa bayang ito.

Base sa imbestigasyon ni PO3 Ernesto Janapin Jr. dakong alas-6 ng hapon nang matagpuan ang bang­kay ng bata na na­kasilid sa isang sako sa loob ng basu­ra­han sa likurang ba­hagi ng bahay ng suspek at kasalu­kuyang sinusunog ng isang kasam­bahay sa utos na rin ng suspek.

Bago ito, nakita pa ng isang residente na nag­punta ang biktima sa tinda­han ng suspek upang bu­mili ng makakain subalit ilang sandali lamang ay narinig ng residente na humihiyaw sa sakit ang biktima na pinanini­wa­laang sinasaksak na ng suspek.

Nabatid na may relas­yon ang ama ng bata na si Manuel Perez, 36 at ang suspek na si Diño. Lumili­taw din na nais na uma­nong makipaghiwalay ni Perez sa suspek na iki­na­galit ng huli kung saan pinaniniwalaang pi­nag­bun­tunan ng galit ang bik­tima.

Nagsasagawa naman ng follow-up operation ang pulisya sa Metro Manila ma­tapos na makatanggap ng impormasyon na nag­tatago ang suspek sa isa sa mga lungsod dito.