Bangkero Festival sa Pagsanjan
MANILA, Philippines - Ipagdiriwang ng Pagsanjan, na tinaguriang tourist capital ng Laguna ang ika-11 Pagsanjan Bangkero Festival mula ngayon hanggang Abril 4, 2009.
Ayon kay Mayor Jeorge “E R Ejercito” Estregan, ang festival na may paksang Turismo Mismo: Ugat ng Pagkakaisa, Kapayapaan at Kaunlaran!” ay naglalayong bigyang pansin ang pangangalaga sa kapaligiran at promosyon ng industriyang panturismo ng Pagsanjan.
“Ang pagdiriwang ay pagpupugay sa patrong Nuestra Señora de Guadalupe, gayundin sa mga bangkero na nagdadala ng mga turista sa Pagsanjan Falls at nagsisilbing “frontliners” sa lokal na industriyang panturismo,” pahayag ni Mayor Estregan.
Magkakaroon din ng BANDigmaan Battle of the Bands, at pagtatanghal ng Bayanihan Philippine National Dance Company, Shirley Halili-Cruz Ballet Company, Douglas Nierras Powerdance, at ang Sining Katutubo Dance Assembly.
Ang iba pang mga aktibidad ay ang Lakan at Binibining Pagsanjan, Ginoong Pagsanjan Bangkero, Palarong Bangkero at inter-school videoke challenge, street dancing, patimpalak sa drum and lyre, at sa pagtatapos ay ang fluvial parade sa Ilog Pagsanjan.
Sa kaugnay na balita, nagbigay ang Department of Tourism ng P3 milyong pondo sa pamahalaang lokal para sa pagpapatayo ng Central Boatman Station para sa mga nagnanais magtungo sa Pagsanjan Falls. Para sa detalye, tumawag sa 049-8084057.
- Latest
- Trending
