Opisyal ng pulis kinasuhan ng alkalde

CAMARINES NORTE – Pormal na ipaghaharap ng kaukulang kaso sa National Police Commission ang isang opisyal ng pu­lisya na sinasabing nam­bastos sa ilang opisyal ng lokal na pamahalaan ng Daet, Camarines Norte.

Desididong sampahan ng kaso ni Daet Mayor Tito S. Sarion, ang tumatayong police provincial director na si P/Supt. Noel Constan­tino, na sinasabing may ilang ulit na hindi sumipot sa gaganaping pormal na turnover of command ng hepe ng pulisya sa nabang­git na bayan.

“Mismong si Constan­tino ang nagbigay ng petsa at oras sa gagawing formal turnover noong Lunes ng hapon subalit hindi sinipot at maging ang outgoing na si P/Supt. Ricardo Villa­nueva kung saan ang ipa­palit ay si P/Supt. Enrique Ramos Jr.,” pahayag ni Sarion.

Nabatid kay Sarion na dapat sana ay noong pang December ang turnover subalit binalewala ni Cons­tantino ang kautusan ng regional police. “Isang tahasang pambabastos sa aking pamamahala ang ginawa ni Constantino,” dagdag pa ni Mayor Sa­rion.

Una nang ikinagalit ni Sarion ang biglaang pag­papalit ng chief of police sa kanyang bayan noong June 2008 na hindi muna ipinaalam ni Constan­ tino.

Nakatakda ring maki­pag-usap si Sarion kay DILG Sec. Puno upang iparating ang kawalang respeto ng mataas na opisyal ng PNP sa nasa­bing lalawigan.

Sinikap naman kunin ang panig ni Constantino subalit hindi makontak at sinasabing hindi pinahi­hintulutan ang mga ma­mamahayag na maka-interview ang nasabing opis­yal. (Francis Elevado)