Palengke pinasabog
KIDAPAWAN CITY – Sumabog nang wala sa oras ang isang improvised explosive device (IED) na itinanim sa entrance gate ng public market ng Isulan, Sultan Kudarat, kahapon ng madaling araw.
Sa pahayag ni P/Supt. Joel Limson, hepe ng Tacurong City PNP, lumilitaw sa inisyal na pagsusuri na gawa sa bala ng 81mm mortar na ginamitan ng cellular phone kaya nag-malfunction ang ginawang bomba kaya ‘di-agad sumabog sa itinakdang oras.
Nadiskubre rin na naka-anim na missed calls na ang nakarehistro sa mobile phone, ayon kay Limson.
Samantala, sa Tacurong City, bandang alas-7:30 ng umaga kahapon, natagpuan ng mga kawani ng Julson Bakeshop sa Malvar Street ang inabandonang bagahe na naglalaman ng isa pang IED, na ayon kay Limson, ay gawa rin sa 81mm mortar.
Agad naman rumesponde sa erya ang mga elemento ng 65th Explosives and Ordnance Disposal (EOD) team ng Philippine Army na nakabase sa Tacurong City at pinasabog ang bomba, bandang alas-7:30 ng umaga, kahapon.
Nabahala naman ang mga residente ng Sultan Kudarat sa panibagong pambobomba kung saan pinalakas at mas pinaigting pa ang pagbabantay ng kapulisan sa mga pampublikong lugar, tulad ng terminal ng bus, public market, at ilang government installation.
Naganap ang pagsabog sa Sultan Kudarat, isang linggo makaraan ang madugong pambobomba sa isang pampasaherong bus sa public terminal sa Digos City, Davao del Sur kung saan kumitil ng anim-katao at ikinasugat ng 29 iba pa. (Malu Cadelina Manar at Joy Cantos)
- Latest
- Trending