Mag-utol timbog sa droga

Nalambat ng mga awtoridad ang itinuturing na big time drug pusher kasama ang kapatid nito na nagtangkang manuhol sa hepe ng pulisya sa Taytay, Rizal kamakalawa ng gabi.

Kinilala ang mga naaresto na sina George Serrano, 39, alyas Totie Kapalaran na matagal ng nakatala sa watch list ng pulisya sa kasong pagbebenta ng illegal na droga at ate nitong si Aileen Serrano, pawang residente ng Kapalaran Subdivision ng nabanggit na bayan.

Sa ulat ni P/Sr. Insp. Arthur Masungsong ng Rizal Police Special Operations Group (SOG), si George ay nasakote sa kanilang bahay.

Nabatid kay SPO2 Albert Ayuson, ang suspek na si George ay nasakote matapos nitong bentahan ng shabu ang isang pulis na nagpanggap na addict.

Nasamsam mula kay George ang 25 gramo ng shabu, .45 kaliber baril at motorsiklo na ginagamit sa pagbebenta ng droga.

Samantala, si Aileen ay inaresto sa loob mismo ng tanggapan ng SOG matapos na suhulan ng P20,000 si Masungsong kapalit ng kalayaan ng kanyang kapatid. (Ulat ni Joy Cantos)