Mag-ina nadakip sa shabu

MALOLOS, Bulacan – Dinakip ng mga ahente ng Bulacan Criminal Investigation and Detection Group (CIDG) ang mag-inang nagtutulak umano ng droga sa kanilang lugar matapos na magsagawa ng biglaang pagsalakay sa bahay ng mga suspek sa Saint Michael Subdivision sa Marilao, Bulacan kamakalawa ng gabi.

Kinilala ang mag-inang suspek na tulak na sina Cristita Sibug at Marlon Sibug, 23, na nakumpiskahan ng aabot sa 100 gramo ng shabu at mga drug paraphernalia.

Ang pagkakadakip sa mag-inang ‘tulak’ ay bunsod nang ipinalabas na search warrant ni Judge Teresita Baldos ng Malolos RTC branch 17.

Ayon sa ulat ni P/Chief Insp. Eliseo Saquilayan, hepe ng pulisya sa bayang ito, isinailalim ang mag-ina sa isang linggong pagtitiktik at ng maging positibo na nagpapakalat ng droga sa kanilang lugar ay nagsagawa ng pagsalakay.

Dakong alas-9:30 ng gabi nang salakayin ng mga awtoridad ang bahay ng mag-ina at hindi na nakuha pang makapalag. (Ulat ni Efren Alcantara)