Pinas magkakaroon na ng Al-powered weather forecasting

MANILA, Philippines — Dahilan sa magkakaroon na ang Pilipinas ng mo­dernong Al-powered weather forecasting ay malaki ang maitutulong na makasasagip ng buhay at mapapabilis ang pagtugon ng pamahalaan sa kalamidad.

Ito ang inihayag ni Speaker Ferdinand Martin Romualdez na pinuri ang partnership sa pagitan ng Department of Science and Technology (DOST) at Atmos, Inc. sa paggawa ng AI-powered weather forecasting para sa buong kapuluan.

Bukod sa pagtulong upang maging disaster risk resilience ang bansa, sinabi ni Romualdez na makatutulong din ito sa sektor ng agrikultura, maritime safety, paglinang ng imprastraktura, at turismo.

Ang nilagdaang memorandum of understanding sa pagitan ng DOST at Atmos ay iprinisinta kay Pangulong Ferdinand Marcos, Jr. sa Ritz Carlton Hotel sa San Francisco, California. Nasa Amerika ang Pangulo kasama si Romualdez at iba pang mga opisyal para sa Asia Pacific Economic Cooperation Summit.

Sinabi ni Romualdez na ang Pilipinas ay isa sa pinaka-bulnerableng bansa sa climate change na madalas bisitahin o makaranas ng bagyo, pagbaha, at tagtuyot.

Ang Atmo Artificial Intelligence (AI) – enabled hardware ay mayroong software system na nag-aaral ng mga datos upang makapagbigay ng numerical weather prediction. Sinasabing mas mataas ang accuracy nito sa U.S. National Oceanic and Atmospheric Admi­nistration.

Magagamit rin ang AI-weather forecasting sa power generation at distribution utility para maiwasan ang pagkakaroon ng brownout at matiyak ang sapat na suplay ng kuryente sa bansa.